Анна Данилина Хобарт жарысының ширек финалына жолдама алды

Қазақстанның жұптық сындағы бірінші, әлемнің 44-ракеткасы Анна Данилина Хобарт (Аустралия) WTA 250 турнирінің ширек финалына шықты, деп хабарлайды Kazinform. 

Өткен аптада Окленд (Жаңа Зеландия) WTA 250 жарысында жеңімпаз атанған А.Данилина бұл жолы украиналық Надежда Киченокпен жұп құрып, Хобартта 4-ракетка болып тіркелді.

Қазақстандық-украиналық жұп бастапқы кездесуін Беларусь өкілі Лидия Морозова – поляк қызы Катажина Питермен өткізді.

Бірінші партияда А.Данилина – Н.Киченок 7:5 есебімен басым түсті.

Олар екінші сетті де брейкпен бастады – 2:0. Дегенмен есеп 5:4 болып, матчқа доп бергенде, Л.Морозова – К.Питер брейк жасап кетті. Есесіне тай-брейкте Анна мен Надежда ұпай ұстатқан жоқ – 7:6 (7:0).

Бір сағат 40 минутқа созылған бәсеке барысында қазақстандық-украиналық жұп 2 эйспен бірге 9 брейк-пойнттың үшеуін өз есептеріне жазды. Л.Морозова – К.Питер 2 эйс, 2 брейкпен (8 брейк-пойнт) шектелді.

Анна Данилина – Надежда Киченок жартылай финалға шығу үшін аргентиналық Надя Подороска – мысырлық Маяр Шерифпен таласады. Бұл дуэт алғашқы айналымда ресейлік Яна Сизикова – тайбэйлік У Фан-сяньды 7:5, 1:6, 10:6 есебімен тізе бүктірді.

Еске сала кетейік, бұдан бұрын Дмитрий Попконың Буэнос-Айресте негізгі турнирге өткенін жазған болатынбыз.

Аустралия ашық чемпионаты қазақстандық теннисшілер үшін сәтсіз басталды.

Юлия Путинцева Хобартта ұтылып жатып, жеңісті жұлып алды.