Анна Данилина Варшава жарысының жартылай финалына өтті

НҰР-СҰЛТАН. ҚазАқпарат – Қазақстанның жұптық сындағы бірінші, әлемнің 23-ракеткасы Анна Данилина Варшава WTA 250 жарысының жартылай финалына өтті, деп хабарлайды ҚазАқпарат тілшісі.

Турнирдің 4-ракеткалары А.Данилина мен германиялық Анна-Лена Фридзам ширек финалда румыниялықтар Александра Игнатик – Габриэла Лимен шеберлік байқасты.

Қазақстандық-германиялық жұп 6:2, 6:3 есебімен жеңіске жетті.

Бір сағаттан сәл астам уақытқа созылған бәсеке барысында Данилина мен Фридзам 2 эйс жасап, 9 брейк-пойнттың төртеуін пайдаланды. Румыниялықтар 1 эйс, 1 брейктен (7 брейк-пойнт) аса алмады.

Қазақстандық-германиялық жұптың жартылай финалдағы қарсыластары кейін анықталады.

Еске сала кетейік, бұдан бұрын Анна Данилинаның Варшава турнирінің ширек финалына шыққанын , Қазақстанда қыркүйекте бірнеше халықаралық турнир өтетінін жазған едік.