Антальяны африкалық шаң басып, аспан қызғылт сары түске боялды
АСТАНА. KAZINFORM — Антальяда сирек кездесетін табиғи құбылыс қалыпты көріністі мүлде өзгертіп, пейзажды Марс ғаламшарына ұқсатып жіберді. Солтүстік Африкадан келген құмды шаң аспанды қызғылт-сары түске бояп, «лас жаңбырдың» жаууына себеп болды. Бұл жағдай жергілікті тұрғындардың тұрмысын қиындатты, деп Kazinform агенттігінің Анкарадағы тілшісі хабарлады.
GZT басылымының мәліметінше, Түркияның Анталья провинциясында, әсіресе Аланья ауданында Солтүстік Африкадан келген шаң массаларының таралуы байқалған. Ауадағы ұсақ бөлшектердің көп болуына байланысты аспан қою қызғылт-сары-қызыл түске енген, ал көріну деңгейі айтарлықтай төмендеген.
Қала үстін қалың шаң бұлты басып, қою тұман әсерін тудырған. Жағалау, теңіз және биік ғимараттар көзге әрең көрініп, айналаны ерекше, тіпті сюрреалистік көрініске айналдырған. Жергілікті тұрғындар бұл құбылысты таңданыспен бақылаған.
Жағдайды жаңбыр одан әрі ушықтырды: жауған жаңбыр ауадағы шаңмен араласып, «лас жаңбырға» айналған. Жолдарда қоңыр түсті шалшықтар пайда болып, көліктер мен көшелер жабысқақ шаң қабатымен қапталған.
Әсіресе жүргізушілерге қиын болған – жолдар тайғақ әрі лас болғандықтан, көлік қозғалысы қиындаған. Көлік иелеріне сарғыш-қоңыр қабатпен жабылған машиналарын тазалауға көп уақыт жұмсауға тура келген.
Мұндай құбылыстар сирек болғанымен, бұл өңір үшін таңсық емес. Сахара шөлінен шаңның Жерорта теңізі елдеріне жетуі белгілі бір ауа райы жағдайларында ара-тұра болып тұрады. Бұл ауа сапасына да, адамдардың күнделікті өміріне де әсер етеді.
Бұған дейін Түркияда климаттың өзгеруі табиғи тепе-теңдікті бұзып жатқаны айтылған еді. Ғасырлар бойы тау шыңдарын жапқан мұздықтар жылдам еріп, олардың орнында тастар, бұлақтар және алаңдатарлық болжамдар қалып отыр.
Ыстанбұл климаттық қауіптерге қарсы шараларды күшейтпек.
