Аргентина президентінің кортежіне демонстранттар тас пен бөтелке лақтырды
АСТАНА. KAZINFORM – Хавьер Милей үгіт-насихат шарасын өткізбек болған кезде оның қарсыластары кортежіне тас пен бөтелке лақтырған.
La Gaceta басылымының мәліметінше, оқиға Буэнос-Айрес провинциясындағы Ломас-де-Самора қаласында болды. Мұнда 2025 жылдың 7 қыркүйегінде жергілікті заң шығарушы органдардың сайлауы өтеді деп жоспарланған.
– Милей төбесі ашық көлікте жиналғандармен сәлемдесті. Онымен бірге сыбайлас жемқорлыққа қатысы бар деген күдікке ілінген әпкесі Карина Милей де болды, - делінген хабарламада.
Осы кезде оның жақтастары, полиция және демонстранттар арасында қақтығыс туындады. Президенттің қауіпсіздік қызметі мемлекет басшысын дереу қауіпсіз жерге көшірді.
Президенттің ресми өкілі Мануэль Адорни тәртіпсіздіктерден ешкім зардап шекпегенін айтты. Ол тәртіпсіздіктерге бұрынғы президент Кристина Фернандес де Киршнердің жақтастарын айыптады.
2025 жылдың ақпанында Аргентинада оппозиция президентке криптовалюталық жарнамаға қатысты импичмент жариялауды талап етті. Наурызда Буэнос-Айрестің орталығында үлкен наразылық акциясы өтті. Онда қатысушылар зейнеткерлерді қолдауға, тұрмыс жағдайын жақсартуға және полицияның әрекеттеріне қарсы тұруға шақырды.
Еске сала кетейік, Аргентина соты Кристина Киршнерді мемлекеттік қызметтен өмір бойына шеттетті.
