«Арсенал» 2023 жылғы Англия суперкубогының иегері атанды

АСТАНА. ҚазАқпарат - «Арсенал» футболдан Англия суперкубогының иегері атанды. Лондондық клуб «Манчестер Сити» командасынан басым түсіп, кубокты төбесіне көтерді, деп хабарлайды ҚазАқпарат тілшісі.

Кездесуде командалар бір-бірінің қақпасы маңында жиі бой көрсетті. Нәтижесінде 77-минутта манчестерлік клубтың 21-жастағы ойыншысы Коул Палмер есеп ашып, өз ұжымын жеңіске жақындата түскен еді. Оған лондондық футболшылар лайықты жауап берді.

Ойынның соңғы минуттарында «Арсенал» алға қарай лап қойды. Таразы басын теңестіруге ұмтылған олардың ойлағаны жүзеге асты. Олардың қатарынан Леандро Троссард 100-минутта көздеген нысанадан мүлт кеткен жоқ.

Осылайша ойынның негізгі кезеңі 1:1 есебімен тең аяқталып, жеңімпаз пенальти сериясында анықталды. Бұл жолы «Арсенал» ойыншылары төрт мәрте қақпаны дәл көздесе, оған манчестерлік клуб бір ғана голмен жауап қайырды.

Нәтижесінде лондондық клуб 2023 жылғы Англия суперкубогының иегері атанды. Олар мұндай жоғары марапатқа 17 мәрте ие болып отыр.

Еске салсақ, әйгілі қақпашы Буффон футболдан кеткенін мәлімдеді.