Асхат Шахаров өрт сөндіру жұмыстарының кеш басталғанын сынға алды
АҚТӨБЕ. KAZINFORM - Ақтөбеде қамыстан басталып, бау-бақша ұжымдарына тараған өртті сөндіру кеш басталған. Асхат Шахаров қарашаға дейін барлық қауіпті аумақты қарап шығуды тапсырды.
Ақтөбе қаласындағы өрттен кейін төтенше жағдайлар мен жергілікті атқарушы орган қызметкерлері жиын өткізді. Онда хабарлама түскен бойда шұғыл қимылдау мәселесі қозғалды.
- Кеше қаупі жоғары өрт болды. Жігіттер бәрін жақсы ұйымдастырып, төтеп берді. Бірақ кеш бастады. Сигнал түскен кезде шұғыл шешім қабылдау керек. Әр ауылда өкілдеріңіз бар. Шынын айтқанда, трагедияның аз-ақ алдында қалды. Сондықтан техника, қажетті күш пен қаржыны ұйымдастыру шарасы шұғыл қабылдануы керек. Қамыс қурап тұр, 5-7 секундтың өзі жеткілікті. Өзен бойы да құрғап қалған. Өрттің үлкен-кішісі жоқ. Сондықтан хабарлама түскен бойда бар күшті жұмылдыру керек. Қолдан шығарып алсаңдар, проблема болады. Ақтөбе қаласының әкімі, облыстық ТЖД бастығы, облыстық табиғи ресурстар және табиғатты пайдалануды реттеу басқармасы, кәсіпкерлік басқармасы қарашаға дейін полигон айналасын, өзен бойындағы қамыс пен қауіп төндіретін аумақты бақылауға алу керек,- деді Ақтөбе облысының әкімі Асхат Шахаров.
Ақтөбе облыстық төтенше жағдайлар департаментінің бастығы Қахарман Оразалиннің айтуынша, облыс аумағында өрттің қауіпті кезеңі әлі де сақталып тұр. Биыл 84 дала алқабының өртенуі және 7 орман өрті тіркелген. Облыста 14 ерікті өрт сөндіру құрылымы бірлестігі жұмыс істейді. Олар 142 команда және екі мыңға жуық адамнан тұрады. Ерікті өрт сөндірушілер 200-ден астам өрт сөндіру мотопомпасы және 1500-ден астам арнайы өрт сөндіргіштермен жабдықталған. Қахарман Оразалин табиғи өрттердің таралу қаупін азайту үшін ерікті өрт сөндіру құрылымыые белсенді түрде тартып, аудан әкімдері тарапынан тиісті бақылауды қамтамасыз ету қажеттігін атап өтті.
Еске салсақ, сәрсенбі күні Ақтөбеде қамыс өртеніп, қатты жел салдарынан өрт бау-бақша ұжымдарына жайылды. Өрт 3 сағаттан астам уақытта сөнірілді. Сөндіру жұмыстарына полиция, әскерилер де жұмылдырылды.
