Асиф Али Зардари екінші рет Пәкістан президенті болып сайланды
АСТАНА. KAZINFORM — Aсиф Али Зардари Пәкістанның екі палатасында (Ұлттық ассамблея (төменгі палата) және Сенатта (жоғарғы палата), сондай-ақ төрт аймақтық ассамблеяда өткен дауыс беру нәтижесінде екінші рет ел президенті болып сайланды, деп жазады Анадолы.
The News International басылымының хабарлауынша, президенттік сайлау 8 ақпанда Пәкістанда өткен жалпы парламенттік сайлаудан кейін өтті.
Алдын ала нәтижелерге сәйкес, Пәкістан халық партиясы (ХПП) мен Пәкістан Мұсылман лигасы - Наваздың бірлескен кандидаты Зардари екінші рет Пәкістан президенті болып сайланды.
Асиф Али Зардари 1955 жылы Карачиде дүниеге келген. 2008-2013 жылдар аралығында президент қызметін атқарған. Зардаридің әйелі 2007 жылы 27 желтоқсанда қарулы жанкешті шабуылдың салдарынан қайтыс болды.
