Астана күніне орай ақтөбеліктер 938 пәтер мен 500 жер телімін алды

АҚТӨБЕ. ҚазАқпарат - Бүгін Астана күніне орай Ақтөбеде 938 пәтер берілді. 198 пәтерді тұрғын үй қорында кезекте тұрған қалалықтар алды, 206 пәтер «Қазақстандық ипотека комапниясы» желісімен берілді, 540 пәтерге Тұрғын үй құрылыс жинақ банкінің салымшылары ие болды.

«Нұр Ақтөбе» шағынауданы пәтерлерінің 45 кілті салтанатты түрде табысталды. Шараға облыс әкімі Бердібек Сапарбаев қатысып, пәтер иелерін Астана күнімен құттықтады, денсаулық, тыныштық және құт-береке тіледі.

Сонымен бірге, индивидуалды тұрғын үй құрылысында жер теліміне кезекке тұрғандарға жер телімдерін табыстау рәсімі өтті.  Онда 500 жер телімінің құжаттары берілді.

- Ақтөбеде 102 мың адам жер теліміне кезекте тұр, 2003 жылдан бері кезек күтіп жүргендер бар. Біз осы мәселені шешуге тырысамыз. 2016 жылы 5 мың жер телімін беруді жоспарлап отырмыз.  2017 жылы - 15 мың, ал 5 жылда барлық кезек күтушілерді жер телімімен қамтамасыз ету керек. Ол үшін алдын ала инфрақұрылым жасау қажет, - деді әкім. 

85 жастағы Жұпар Қазақова бүгін жаңа пәтерге қоныстанды. Зейнеткер 1 бөлмелі пәтер кілтін алды. 75 жастағы Зылиха Әйтешева 3 бөлмелі пәтерге ие болды. 9 баланың анасы 10 жыл бойы баспана кезегінде тұрған. Қоныс тойын балаларымен және 14 немересімен, 12 шөбересімен бірге тойлайды.