Астанада «Қазақ рухын оятқан тұлға» атты көрме ашылды
АСТАНА. KAZINFORM — ҚР Мәдениет және ақпарат министрлігінің қолдауымен Ұлттық музейде Міржақып Дулатұлының 140 жылдығына арналған «Қазақ рухын оятқан тұлға» атты көрме мен дөңгелек үстел өтті.
Алдымен шара басы дөңгелек үстелден басталды. Келелі кездесуге белгілі ғалымдар, мемлекет және қоғам қайраткерлері, ақынның туыстары, Қостанай облысының делегациясы мен Астана қаласындағы М.Дулатұлы атындағы мектеп мұғалімдері мен оқушылары қатысты.
— Ұлы Дала өркениеті күйреп жатқан кезде, ақын-жыршылар мемлекеттілігімізден айрылып, бодан болдық деп айтып жүрген кезде ұлтымыздың рухани жаңғыруын жасаған осы Алаш зиялылары еді. Міржақып сынды қайраткерлер — қазақты саяси ұлтқа айналдырған тұлғалар. «Қазақ рухын оятқан тұлға» дегеніміз көркем сөз емес, бұл нақты факт, — деп атап өтті ҚР Мәжіліс депутаты, тарих ғылымдары докторы Еркін Әбіл.
Көрменің ашылуына ҚР Сенаты мен Мәжіліс депутаттары қатысты. Депутат Нұртөре Жүсіп өз сөзінде көрменің қазақ руханияты үшін маңызды екендігін тілге тиек етті.
— Міржақып Дулатұлы Алаш арыстарының сапында Қазақтың азаттығы үшін жанын берген азамат. Кешегі күнге дейін есімдері ұмытылып, «Халық жауы» деген айдар тағылып келді. Тәуелсіздік алғаннан кейін елге есімі оралды, еңбектері жарыққа шыға бастады. Тіпті, 1988 жылы ақталғаннан кейін 1992 жылы елге сүйегі жеткізілді. Өмірі айдауда өтті ғой. Сондықтан 140 жылдық мерейтойын лайықты деңгейде атап өтуіміз керек. Бүгінгі ашылып отырған көрме, Алаш арысының рухына деген құрметтің тек бір ғана белгісі. Әрі, бұл көрменің өскелең ұрпаққа берері мол. Ұлттық руханиятқа қосары көп, — дейді ҚР Парламенті сенатының депутаты Нұртөре Жүсіп.
Көрмеге қойылған құнды жәдігерлердің барлығы дерлік Торғай өңірінен жеткізілген. Оған Міржақып Дулатұлы мен жары Ғайнижамалдың қолданған заттары, отбасылық мұралары қойылған. Айта кету керек, Қоғам қайраткерінің туған жерінен 130 жәдігер әкелініпті.
— Бүгінгі көрмеге 130 жәдігер алып келіп отырмыз. Фото құжаттары бар. Міржақып атамыздың тұтынған заттары бар. Оны бізге тапсырушы Алаштың кейуанасы деп айтамыз Міржақыптың қызы Гүлнар апамыз болатын. Ол кісі Ғайнижамал апаның төркінінен келген жиһаздарды бізге сыйға тартқан болатын. Оның ішінде мен Торғайдан алып келе алмаған бірнеше жәдігерлерім бар. Соның бірі — 14-ші жылы неке қиғаннан кейін Ғаинижамалдың төркінін келген ас столы болатын. Гүлнар апаның сөзінше 200-ге жуық ұлт зиялылары сол ас үстелінде дастархандас болыпты — деп, жәдігерлердің жиналу тарихымен бөлісті Жангелдин мұражайлар кешенінің басшысы Гүлбану Сәрсекей.
Сәні мен салтанаты келіскен тарихи көрмені тамашалауға келген көрермендер санында шек жоқ. Айта кетейік, көрме сәуір айының 17-не дейін жалғасады.
