Ата-ана құқығынан шеттетілген әйел баласымен қайта қауышты
АСТАНА. KAZINFORM — 2022 жылы 5 жасар баланың анасының ата-аналық құқығы шектеліп, бала балалар үйіне берілген. 2023 жылы баланың анасы ата-ана құқығын қалпына келтіріп, баласын қайтару туралы сотқа жүгіген, оның арызы қанағаттандырылып, бала мен ана қайта қауышты.
2022 жылы 5 жасар баланың анасының ата-аналық құқығы шектеліп, әкесі - ол құқынан айырылған. Ата-аналар балаларына оны асырауға алимент төлеуге міндеттелді. Бала мамандандырылған балалар үйіне, кейін ерлі-зайыптылардың қамқоршыларына берілді.
- 2023 жылы баланың анасы ата-ана құқығын қалпына келтіріп, баласын қайтару туралы талаппен сотқа жүгінген. Сотта ол ұлы өзінің өмірін өзгертуге және денсаулығын қалпына келтіруге бірден-бір стимул екенін айтқан. Тұрақты жұмыс тапқанын, есірткі қолданудан бас тартқанын, наркологиялық орталықтың есептен шығарылғанын айтқан, - делінген Сот хабарламасында.
Сондай-ақ ол өзінің жіберген қателіктерін түзетуге тырысатынын, ұжымның сенімі мен құрметіне ие болғанын және күш-жігерінің арқасында медбикеден сатушы консультантына дейін көтерілгенін атап өткен.
- Ұсынылған құжаттар оның психиатриялық диспансерде есепте тұрмағанын, ресми түрде жұмыс істейтінін, тұрақты табысы барын және соттылығының жоқтығын растады. Астана қаласының кәмелетке толмағандардың істері жөніндегі мамандандырылған ауданаралық соты істі зерттей келе, жұмыс беруші мен полиция қызметкерлерінің оң анықтамаларын, алименттің уақытылы төленгенін, сондай-ақ ананың меншігінде екі пәтердің барын, оның біреуін жалға алып, қосымша кіріс әкелетінін ескерді, - делінген хабарламада.
Сот егер туған ата-анасы баланың дұрыс дамуы мен күтімін қамтамасыз ете алатын болса, баланың отбасында тәрбиеленуге құқығы бар екенін ескерді. Талап қою толығымен қанағаттандырылды. Баланың анасының ата-аналық құқықтары қалпына келтірілді, одан алимент өндіріп алу тоқтатылды.
Қаулы заңды күшіне енді.
Еске салсақ, елде «Ата-аналар академиясы» жобасы іске қосылады.
