Ата-аналар мектептегі тамақтандыру процесін тікелей бақылай алады – министр
Мектеп оқушыларын ыстық тамақпен қамту процесін ата-аналардың тікелей бақылау мүмкіндігі бар. Бұл туралы Оқу-ағарту министрі Ғани Бейсембаев мәлім етті, деп хабарлайды Kazinform.
«Мектепте ыстық тамақ беру бала ағзасына және интеллектуалдық дамуына оң ықпал етеді. Осы орайда бұл мәселеге ерекше назар аударып отырмыз. Бұған дейін еліміздегі 9 өңірде ғана оқушылар тегін ыстық тамақпен қамтылған болса, биыл 1 қыркүйектен бастап барлық өңірдегі 1,4 млн бастауыш сынып оқушысы мен 5-11 сыныптар аралығындағы 200 мың әлеуметтік аз қамтылған отбасы балалары мектептерде тегін тамақтанып жатыр», - деді Ғани Бейсембаев Орталық коммуникациялар қызметі алаңында өткен баспасөз қызметінде.
Министрдің айтуынша, тамақтандыру жүйесінің нормативтік-құқықтық базасы жетілдірілді.
«Мектепте тамақтандырумен айналысатын ұйымның алдынала санэпидемиологиялық қызмет қорытындысы болуы керек. Мектептегі қамқоршылық кеңес, ата-аналар комитеті, мектеп әкімшілігі, медицина қызметкерінің өкілдерінен құралған комиссия қызметі күшейтілді. Қабылданған шаралар тамақтану сапасын жақсартуды ғана емес, тамақтану мәдениетін арттыруды да көздейді. Біз барлық ата-ананы мектептегі тамақ сапасын бақылауға қатысуға шақырамыз. Ол үшін мектептерде арнайы комиссия бар. Егер комиссияның мүшесі боламын десеңіз, 8 (7172) 74-25-28 телефоны арқылы хабарласып, ақпаратты алуға болады», - дейді ол.
