Атырау облысында ажырасуға бел буған 62 жұп райынан қайтқан

АТЫРАУ. KAZINFORM — Атырау облысында 62 жұп ажырасуға арыз берген. Алайда құқықтық-ақпараттық кеңес беру орталығынан көмек алғаннан соң қайта татуласқан. 

Атырау облыстық ішкі саясат басқармасының басшысы Гүлнұр Сүйеуованың мәліметінше, аталған орталық мамыр айында ашылған. Содан бері 2 мыңға жуық адамға құқықтық көмек берілген. Оның ішінде 510 адам психологтардан отбасылық мәселеге кеңес алған. 

— Біздің мақсатымыз — тұрғындарға құқықтық кеңес беру. Қазір орталықта 2 заңгер, 2 психолог пен медиатор жұмыс істейді. Олар биыл Атырау қаласы мен 7 ауданға ашық есік күнін өткізді. «Заң және тәртіп» тақырыбында 11 жоғары оқу орындары мен колледж студенттерімен кездесуде құқықтық сауаттылыққа баса назар аударылды. Әлеуметтік тұрмысы төмен отбасылардың мүшелері сотқа жүгінуге ұсынатын құжаттарын әзірлеу үшін көмек алды. Орталықтың заңгерлері айырылысуға арыз берген 62 жұпты қайта татуластырды, — дейді «Шаңырақ-2008» қоғамдық бірлестігінің жетекшісі Жанар Ілиясова.

Оның айтуынша, ірі сауда орталықтарында ашық есік күні ұйымдастырылып, 68 адам тегін кеңес алуға жүгінген. Аталған жоба алдағы екі жыл бойы жалғасын табады.

Еске сала кетейік, бұған дейін Атырауда алимент төлемей жүргендер құмар ойынға қыруар қаржы аударғанын хабарлаған болатынбыз.