Атырау облысында кәмелетке толмаған 102 бала қатерлі ісікке шалдыққан
АТЫРАУ. KAZINFORM – Атырау облысында диспансерлік есепте қатерлі ісік ауруына шалдыққан 102 бала тұр. Оның ішінде 1 айлық сәби бар.
Атырау облысының штаттан тыс онкогематологы Гүлжан Ілиясованың айтуынша, онкологиялық ауру кәмелетке толмаған балалар арасында да бар.
– Балалар қатерлі ісік сырқатына сирек шалдығады. Дегенмен, кәмелетке толмағандардың арасында мұндай аурудың пайда болуына бірнеше фактор әсер етуі мүмкін. Өйткені бұл –жасушалардың бақылаусыз өсуі мен бөлінуі нәтижесінде пайда болатын аурулар тобы. Сол үшін жыл сайын скринингтен өтіп тұруы керек. Қазір Атырау облысында қатерлі ісікке шалдыққан 102 бала диспансерлік есепте тұр. Дәрігерлердің тексеруінен кейін 1 айлық сәбиге жедел лейкоз диагнозы қойылды, -дейді Гүлжан Ильясова.
Штаттан тыс онкогематолог Гүлжан Ілиясова және онкогематолог Айдос Дарханов 1-ден 18 жасқа дейінгі балаларды қабылдады. Дәрігерлер 15 баланы медициналық тексеруден өткізді. Балаларға қажетті медициналық кеңес беріліп, диагностикалық көмек көрсетілді.
Еске сала кетелік, бұған дейін Атырауда миында сұйықтық көбейген 3 айлық сәбиге күрделі ота жасалғанын хабарлаған болатынбыз.
