Атыраудан Алматыға баратын 160 жолаушы Қарабатан стансасына автобуспен жеткізілді

АТЫРАУ. KAZINFORM – Бүгін Атыраудан Алматыға қаласына баратын жолаушылар пойызына 160 адам билет алған. Жолаушылар теміржолдағы апаттың салдарынан Қарабатан стансасына дейін автобуспен жеткізілді.

Бүгін таңертең Атырау қаласының маңындағы Теңдік стансасында күзетілмейтін өткелде жүк пойызы мен КамАЗ көлігі соқтығысқан еді. Соның салдарынан тепловоз бен 11 жүк вагоны рельстен шығып кетті. 

«Жолаушылар тасымалы» АҚ баспасөз қызметінің мәліметінше, теміржолдағы апаттың салдарынан 6 жолаушылар пойызы кестеден кешікті. 

Ал Атырау облысы әкімінің баспасөз хатшысы Руслан Жұмағазиевтің мәліметінше, Мақат ауданындағы Қарабатан стансасында тұрған жолаушылар пойызының жолаушылары Атырау қаласына автобуспен тасымалданды. Жолаушыларды тасымалдау үшін «Ақжайық-Автопарк» және «Атырау-Автопарк» ЖШС-дан 10 автобус бөлінді. 

Атырау облыстық төтенше жағдайлар департаменті имидждік жұмыс және сыртқы коммуникациялар тобының ақпаратына қарағанда, мұнайлы шаһардан Алматыға қатынайтын пойызға дейін тасымалдау ұйымдастырылды. 

– Атыраудан Алматы қаласына дейін қатынайтын №41 жолаушылар пойызы Мақат ауданындағы Қарабатан стансасында тұр. Аталған пойызға мінуге билет алған 160 адам 10 автобуспен Қарабатан стансасына дейін тасымалданды. Жолаушылар аталған стансаға дейін жеткізіліп, Алматыға жүретін жолаушылар пойызына отырғызылды, -деп хабарлады департаменттің имидждік жұмыс және сыртқы коммуникациялар тобы. 

Еске сала кетелік, бұған дейін Атыраудағы пойыз апатынан зардап шеккен 3 машинист ауыр жарақат алғанын хабарладық. 

Теміржолдағы апаттың салдарынан кешіккен жолаушылар Атырауға автобуспен тасымалданды. 

Сондай-ақ Атырау маңындағы апаттың салдарынан 6 жолаушылар пойызы кешігетінін жазғанбыз.