Атыраудың Махамбет ауданында Жайық өзенінің деңгейі 7 метрден асты

АТЫРАУ. KAZINFORM – Атырау облысында Жайық өзеніндегі су деңгейі күн сайын көтеріліп келеді. Бүгін Махамбет ауданында 7 метр 28 сантиметрге жетті.

 Атырау облысы жедел штабы
Фото: Атырау облысы жедел штабы

«Қазгидромет» РМК Атырау облыстық филиалының гидрологиялық мониторинг деректеріне сүйенсек, өзен деңгейі Батыс Қазақстан облысының аумағынан келетін су есебінен өзгереді.

Мәселен, бүгін, 26 сәуірде сағат 08:00-де Индербор кентіндегі гидробекетте Жайық өзеніндегі су деңгейі +9 сантиметрге көтеріліп, 613 см болған. Индер ауданында су тасқыны басталғалы бері өзен деңгейі 390 сантиметрге көтерілгені анықталған.

Ал Махамбет ауылындағы бекетте су деңгейі 728 сантиметрге жетіп отыр. Мұнда су бір тәулікте +7 см көтерілген. Жалпы көтерілу деңгейі – 411 сантиметр.

Жайық өзенінің деңгейінің көтерілгені Атырау қаласындағы гидробекетте де байқалады. Бұл бекетте су айдыны +3 сантиметрге көтеріліп, 428 сантиметр болды. Шаһар аумағында су тасқыны басталған кезден бергі көтерілу көрсеткіші 237 сантиметрге жеткен.

Еске сала кетелік, бұдан бұрын Атырауға тасқын судың көп бөлігі мамыр айының басында келуі мүмкін екенін хабарлаған едік.

Сондай-ақ, Жайық өзенінен Атырау маңындағы Соколок каналына су келе бастағанын жазған болатынбыз.

Ал, балықшылар Жайық өзеніне мол су келсе, балық қорының көбеюіне ықпал ететініне үміттенеді.

Соңғы жаңалықтар