Азаматтық қоғамның дамуына мемлекеттік органдардың өзі мүдделі болып отыр – Бибігүл Жексенбай

АСТАНА. KAZINFORM – Азаматтық қоғам жергілікті мәслихат пәрменділігін арттыруға тікелей атсалысуы қажет. Бұл пікірді Сенат депутаты, Қазақстан азаматтық альянсының вице-президенті Бибігүл Жексенбай айтты. 

«Серіктестік, диалог және сенім: берік азаматтық қоғам кепілі» дөңгелек үстелінде Бибігүл Жексенбай Парламент қабырғасында азаматтық институтты дамытуға байланысты кешенді жұмыстар жүріп жатқанын жеткізді. Яғни барлық заңнамалық базаны жасауға азаматтық қоғам институтының өкілдері қатыса алады. Депутаттар азаматтық институттың, үкіметтік емес ұйымдардың өкілдері айтқан ұсыныс-пікірлерге ерекше назар аударып, олардың заңнамалық тұрғыдан шешілуіне атсалысады. 

«Дегенмен кейінгі зерттеулер қазіргі Қазақстан қоғамында азаматтық институттың дамып жатқанына, оның белсенділігі мен пәрменділігіне қатысты халықтың әлі де күмәнін, сенімінің төмен екенін байқатып отыр. Бұл біздің бірлесе ақылдасатын, кеңесетін міндет-шаралардың көптігін көрсетеді. Әлі де біздің азаматтық институттың мемлекетпен серіктестен гөрі тәуелді екенін көп айтатынын көрдік. Яғни қаржылық тәуелділікті, гранттарға тәуелділікті, ғасырлар бойы жұмыс істейтін тарихи институттардың қалыптаса қоймағанын, ҮЕҰ гөрі партияларға сенім жоғары екенін немесе кәсіподақ ұйымдарына, кәсіптік қауымдастықтарға көбірек мән беретінін көрсетіп отыр», - деді Б. Жексенбай. 

Спикердің айтуынша, Сенат депутаттары жаз айларында жергілікті мәслихат жұмыстарын белсенді ету, мәслихат пәрменділігін арттыру бағытында зерттеу жұмыстарын жүргізген. 

«Осы жергілікті мәслихат пәрменділігін арттыруға азаматтық қоғамның тікелей атсалысуы қажет. Жасырары жоқ, кей шалғай аудандарда мәслихат депутаттығына адамдардың қызығушылығы төмендегені, тіпті кандидаттың табылмауы өңірлерде азаматтық қоғам институтын әлі де ойдағыдай дамыта алмай жатқанымызды көрсетеді. Сондықтан бүгінгі басқосуда ұсыныс пен ойлар, заңнамалық тұрғыдан не шешілуі керек екені, мемлекеттік басқару институттарымен байланысты қалайша пәрменді, жемісті, нәтижелі ете алатынымыз туралы ой бөлісеміз, нақты алгоритм жасап шығамыз деп ойлаймын. Қазір мемлекеттік органдардың өзі азаматтық қоғамның барынша дамуына мүдделі болып отыр. Яғни үкіметтік емес ұйымдарға бұрынғыдай арбаның бесінші дөңгелегі ретінде қараса, қазір керісінше мемлекеттік басқаруды барынша тиімді ету жолы екенін Үкімет те түсініп отыр», - деді Б. Жексенбай. 

Сондай-ақ Қазақстан Азаматтық альянсының вице-президенті Гүлнар Құрбанбаеваның айтуынша, кейінгі жылдары Қазақстанның Азаматтық альянсы азаматтық сектордың мемлекетті басқару ісіне белсенді қатысуы және елдің стратегиялық маңызды іс-шараларына араласуы бойынша мемлекеттік саясатты іске асыруда жұмысын едәуір жандандырды. 

«Бұл тұрғыда үлкен қадам жасалды – бірлесіп жұмыс істеу үшін барлық өңірді біріктірдік, мемлекеттік органдардың барлығында дерлік Қазақстанның Азаматтық альянсының өкілдері бар. Сондай-ақ бизнес субъектілерімен, квазимемлекеттік сектормен сындарлы әрі тиімді диалог орнады. Көптеген мәселенің шешілуі мемлекеттік органдармен тиімді диалогтың жолға қойылуына байланысты екені сөзсіз. Бүгін біз тек проблемалар туралы ғана емес, қол жеткізілген жетістіктер мен «халық үніне құлақ асатын мемлекет» саясатының қаншалықты тиімді жүзеге асып жатқаны туралы айтамыз. Алдағы уақытта бізді не күтіп тұрғанын, қандай бағыттарға назар аудару керектігін және қайда бірге ұмтылу қажеттігін талқылау маңызды», - дейді Г. Құрбанбаева.

Айта кетейік, Қазақстанда 23 мыңнан астам үкіметтік емес ұйым бар.

Сондай-ақ жаңа Азаматтық қоғам тұжырымдамасын жасауға әр азамат үлес қоса алады.