Әзербайжан Армениямен бейбіт келісімге қол қою үшін негізгі шарттарын атады

АСТАНА. KAZINFORM – Әзербайжан Президенті Ильхам Әлиев Армениямен түпкілікті бейбіт келісімге қол қою мүмкіндігіне жол ашатын басты шарттарды жария етті. Бұл туралы Kazinform агенттігінің тілшісі Әзербайжан Президентінің ресми сайтына сілтеме жасап хабарлады.

Мемлекет басшысының айтуынша, бейбіт үдерісті Әзербайжан өзі бастап қана қоймай, келісімнің алғашқы жобасын да әзірлеген. Бұл жоба 8 тамызда Вашингтонда парафирленген құжаттың негізіне айналған.

— Біз келіссөздерді бастауға ұсыныс жасап, бейбіт келісімнің алғашқы жобасын әзірледік. Ақ үйде парафирленген құжат — мемлекеттер арасындағы қарым-қатынасты реттеу жөніндегі Әзербайжан көзқарасының көрінісі, – деді Ильхам Әлиев.

Алайда, президенттің айтуынша, келісімге толық қол қою әлі де мүмкін емес, себебі Армения Конституциясында Әзербайжанның аумақтық тұтастығына күмән келтіретін бап бар.

Әзербайжанның басты шарты — Армения Конституциясына өзгерістер енгізу. Яғни, Әзербайжанға аумақтық талап қоюды жоққа шығаратын конституциялық реформа қажет. Бұл өзгерістер енгізілгеннен кейін ғана ресми Баку түпкілікті бейбіт келісімге қол қоюға дайын болады.

– Біз Армениядан тиісті түзетулер енгізуді күтеміз. Бұл келіссөз үдерісінің аяқталғанын және өңірде жаңа дәуірдің басталғанын білдіретін белгі болады, – деп мәлімдеді Әлиев.

Президент сондай-ақ, құжаттың АҚШ-тың бұрынғы президенті Дональд Трамптың қатысуымен парафирленуі – 30 жылдан астам уақыт үзіліспен жалғасқан қақтығыстың аяқталғанының символы екенін атап өтті.

Оның сөзінше, бейбіт келісімнің жүзеге асырылуы Оңтүстік Кавказ ғана емес, Орталық Азия мен Таяу Шығыс аймақтарына да жаңа мүмкіндіктер ашады.

Бұған дейін Армения Премьер-министрі бейбіт келісім үшін Конституцияға өзгеріс енгізуге дайын екенін мәлімдеген болатын.

Айта кетейік, 8 тамызда Әзербайжан Президенті, Армения Премьер-министрі және АҚШ Президенті Вашингтонда Баку мен Ереван арасындағы қатынастарды бейбіт жолмен реттеу туралы бірлескен декларацияға қол қойған.