Әзербайжан, Түрікменстан мен Өзбекстан ынтымақтастықтың жаңа үлгісіне көшті

АСТАНА. KAZINFORM - Түрікменстанның батысындағы Түрікменбашы қаласында Әзербайжан Президенті Ильхам Алиев, Түрікменстан Халық Маслахатының төрағасы Гурбангулы Бердымұхамедов және Өзбекстан Президенті Шавкат Мирзиеевтің қатысуымен жоғары деңгейде кездесу өтті, деп хабарлайды Kazinform агенттігінің меншікті тілшісі.

Кездесу шеңберінде транспорт, энергетика, логистика, гуманитарлық және мәдениет салаларында ынтымақтастықты дамытуға бағытталған бірқатар екіжақты және көпжақты құжаттарға қол қою рәсімі өтті. Басты назар тұрақты даму, табиғи ресурстарды тиімді пайдалану және өзара сауданы ұлғайту мәселелеріне аударылды.

Әзербайжан Президенті Ильхам Алиев үш елдің өңірдің болашағы үшін тиімді жұмыс істеуіне мүкіндік беретін ынтымақтастықтың үшжақты форматы құрылатынын мәлім етті.

-Біз құрмет пен тату көрші ұстанымына негізделген ынтымақтастықтың жаңа үлгісін құрып жатырмыз,-деді ол сөйлеген сөзінде.

Түрікменстан Халк Маслахатының төрағасы Гурбангулы Бердымұхамедов пен Өзбекстан Президенті Шавкат Мирзиеев бүгінгі кездесудің жан-жақты ынтымақтастыққа жаңа серпін беретініне сенім білдірді.

Кездесу барысында мәдени және гуманитарлық бастамалар да назардан тыс қалған жоқ. Мемлекет басшылары білім, ғылым және туризм салалары бойынша мемлекетаралық деңгейде тәжірибе алмасу ісін жандандыру қажеттігін айтты.

Іс-шара аясында өзара ортақ мақсаттар мен ынтымақтастықтың бағыттары айқындалған Бірлескен декларацияға қол қойылды. Құжатта көлік бағыттарын дамытып, энергетикалық қауіпсіздікті күшейту және гуманитарлық байланыстарды кеңейтудің маңыздылығы айтылды.

Осыған дейін біз Ильхам Әлиев Гурбангулы Бердімұхамедовке сәйгүлік сыйлағаны туралы жаздық.