Азия ойындары: Қазақстандық спортшылар артистік жүзуден командалық сайыста қола алды

Қытайдың Ханчжоу қаласында өтіп жатқан Азия ойындарының соңғы жарыс күнінде қазақстандық спортшылар артистік жүзуден командалық сайыста үшінші орын алды, деп хабарлайды ҚазАқпарат тілшісі.

Қазақстандық спортшылар сайыс барысында 663.7417 балл жинап, қола жүлдеге қол созды. Бірінші орынға Қытай (868.9676) ие болса, Жапония (831.2535) екінші орынға тұрақтады.

Бұл - қазақстандық спортшылар қол жеткізген 79-медаль. Қазірге дейін ел құрамасы жалпы командалық есепте 10 алтын, 21 күміс, 48 қоламен 9-шы орында тұр.

Сондай-ақ, Азия ойындарында каратэші Мөлдір Жаңбырбай финалға жолдама алды.

Енді ол финалда 2018 жылғы Азия ойындарының чемпионы, тайбэйлік Шиау Шуанг Гумен алтынға таласады.