«Барыс» шайбалы хоккейден Блинов турниріне қатысады

АСТАНА. KAZINFORM — Қазақстандық «Барыс» командасы Ресейдің Омбы қаласында шайбалы хоккейден Блинов турниріне қатысады.

Биыл отызыншы мәрте жалауын көтеретін турнирге барлығы бес команда қатысады.

Олардың қатарында Ресейдің «Авангард» (Омбы), «Локомотив» (Ярославль), «Сибирь» (Новосібір) және «Трактор» (Челябинск) командалары бар.

Дәстүрлі турнир 20-25 тамыз күндері өтеді.

Айта кетсек, елордалық клуб жаңа маусымды өз айдынындағы ойындар сериясымен бастайды.

Алғашқы үш кездесуін Ресейдің «Нефтехимик» (4 қыркүйек), «Трактор» (6 қыркүйек) және «Амур» (9 қыркүйек) командаларына қарсы өткізеді.  

Сондай-ақ биыл Дэвид Немировски «Барыс» хоккей клубының бас бапкері қызметіне тағайындалды. 

Канадалық маманмен жасалған келісімшарт бір жылға есептелген.

Дэвид Немировски Құрлықтық хоккей лигасында 2015 жылдан бері еңбек етіп келеді.