Баянауылда Аймауытов құрған «Мәдени кіндік» мекеніне белгітас қойылды
ПАВЛОДАР. KAZINFORM - Ертіс-Баян өңірінің әйгілі перзенті, Алаш қайраткері Жүсіпбек Аймауытов негізін салған тарихи мекен – Баянауылдағы «Мәдени кіндік» рухани тәрбие және білім беру кешеніне белгітас орнатылды.
Биыл әйгілі жерлесіміздің туғанына 135 жыл толып отыр. Сонау аумалы-төкпелі заманда Жүсіпбек Аймауытовтың ұлт мүддесі жолында атқарған істері аз емес. Соның бірі 1921 жылы Семей губерниясында оқу бөлімінің меңгерушісі болып тұрғанда оның ықпалымен Баянауыл жерінде ашылған «Мәдени кіндік» білім ошағы.
Бұл қазақ даласындағы жұттан халық аштыққа ұшыраған кезең еді. Ел-жұрт босып, жетім қалған балалар көбейіп, оларды жергілікті бас көтерер азаматтар Жүсіпбектің айтуымен Қызылтау өңіріне жинайды. Ж.Аймауытов және онымен пікірлес ел азаматтары Қызылтау маңында «Мәдени кіндік» деп аталатын білім ошағын салуға бел буады.
1921 жылы Алаш ардақтысы жергілікті төрт рудың ірі байларының қаржыландыруымен әлгі жерге әуелі бастауыш мектеп салуға ұйытқы болады. Кейін қыздар мен ер балалардың бөлек жатақханалары, асхана, бірнеше қойма, жертөле қойма, «қызыл отау», дәрігерлік пункт, әкімшілік ғимарат және атқора тұрғызылады. Білім беру кешені шамамен 1929 жылға дейін жұмыс істеп тұрған деген дерек бар.
«Мәдени кіндік» мекеніне белгітас қою идеясын Ж.Аймауытовтың аталас туысы, баянауылдық өлкетанушы Рамазан Нұрғалиев алғаш көтерді. Павлодар облыстық Бұқар жырау атындағы әдебиет және өнер музейі мен Жүсіпбек Аймауытов атындағы облыстық қазақ музыка-драма театры демеуші азаматтарды үйлестіріп, белгітас солардың қаржысына қойылып отыр.
- Соңғы жылдары біздің музей ұжымы елді мекендер мен тарихи жерлерді аралап, әдебиетке, өнерге қатысты адамдардың өміріне, шығармашылығына байланысты жәдігерлерін жинақтап жүрміз. Қазақтың біртуар ұлы, Алаш қайраткері Жүсіпбек Аймауытовтың еліне, халқына, туған жерге деген сүйіспеншілігі тілмен айтып жеткізгісіз болған. Былтыр осы мекенге арнайы экспедиция ұйымдастырып, тарихи орынды халық жадында жаңғыртуды мақсат тұтқан едік. Жергілікті өлкетанушы Рамазан Нұрғалиевтің бас болуымен белгітасты қойып отырмыз, – деді Бұқар жырау атындағы әдебиет және өнер музейінің директоры Ербол Қайыров.
Іс-шараға қатысқан Павлодар облысы әкімінің бірінші орынбасары Серік Батырғожинов Жүсіпбек Аймауытовтың мұрасын әрі қарай зерттеп, насихаттауға шақырды.
– Жүрегімізде иман болғаннан кейін ағартушы болу, мешіт, медресе, мектеп салу болашаққа деген көңілдің дұрыс екендігін көрсетеді деп ойлаймын. «Мәдени кіндік» – Жүсіпбек атамыздың бізге қалдырған мұрасы. Оны әрі қарай дамыту, деңгейін көтеру – біздің парыз, – деп атап өтті ол.
Еске сала кетейік, бұған дейін Аймауытов негізін салған Мәдени кіндік ауылы жайында кеңірек жазған едік.
