Бельгия астанасында қазақстандық зергердің көрмесі өтіп жатыр

АСТАНА. KAZINFORM – Жұма күні Брюссельдегі «Muse» галереясында қазақстандық зергер-дизайнер Сержан Бәшіровтың көрмесі өтіп жатыр, деп хабарлайды Kazinform-ның меншікті тілшісі.

ЮНЕСКО-ның үш дүркін лауреаты, қазақстандық зергер Сержан Бәшіров өзінің көрмесін алғаш рет Еуропа атанасында өткізді.

Орталық Азияның шеберлік дәстүрі мен мұрасына негізделген оның әшекей бұйымдары әлемге танымал. Бәшіров Қазақстанның шығысындағы шалғай ауылда туып, көшпенділердің мәдениеті мен дәстүрлерін бойына сіңірген. Өзінің еңбектерінде ол ғұн, қыпшақ, қимақ заманына жататын көне тәсілді қолданады.

Шебер әдетте күміс, жез сияқты және өзге де металдар қоспасы мен ағаш пен сүйекті пайдаланады. Оның ою-өрнектері Қазақстаннан тыс жерлерде де танымал.

Ол өзінің жеке көрмесін алдымен Испанияда өткізіп, кейін Брюссельге келді.

- Бельгиядағы шара Орталықазиялық-Еуропалық шығармашылық альянсының қолдауымен өтіп жатыр. Шараның Наурыз мейрамымен тұспа-тұс келгені қуаныштады. Қазір Еуропада орталықазиялық бұйымдарға қызығушылық артып келеді. Мен Қазақстан мәдениетін Еуропа төрінде ұсынып отырғаныма қуаныштымын, - деді дизайнер.

Осыған дейін қазақстандық тағы бір зергердің Иордания патшайымы таққан бойтұмар ұлттық әшекейімізге сұранысты арттырғаны туралы айтқан еді.