Бидай егу азайып, рентабельділігі жоғары дақылдар аумағы артады – АШМ

АСТАНА. KAZINFORM – Биыл елімізде ауыл шаруашылығы дақылдары егілетін аумақ былтырғы жылға қарағанда 518 мың гектарға артады. Бұл туралы Үкімет отырысында АШМ басшысы Айдарбек Сапаров айтты.

— Ауыл шаруашылығы жалпы өнімін 2 есеге ұлғайту бойынша жол картасына сәйкес биыл да егіс алқаптарын әртараптандыру жұмысы жалғасатын болады. Барлық индикатор әкімдіктерге жеткізілді. Жалпы, ауыл шаруашылығы дақылдарын 23,8 млн гектар жерге орналастыру жоспарланып отыр. 
Бұл өткен жылдың деңгейінен 518 мың гектарға көп, - деді ол.

Оның айтуынша, биыл әртараптандыру бағдарламасы 1 млн гектарға жуық алқапты қамтиды.

— Осылайша, рентабельділігі жоғары дақылдардың аумағы 750 мың гектарға артатын болады, оның ішінде майлы дақылдар алаңы 365 мың гектарға, азықтық дақылдар – 184 мың гектарға, арпа – 114 мың гектарға, қарақұмық – 41,5 мың гектарға, картоп – 15 мың гектарға ұлғаяды. Бұл ретте бидай монодақылынан басқа дақылға ауысу бойынша ауқымды жұмыс жалғасып жатыр. 2 жыл ішінде бидай алаңы 730 мың гектарға, соның ішінде биыл 159 мың гектарға қысқарды, - деді министр.

Ведомство басшысы қазіргі уақытта майлы дақылдар мен бұршақ дақылдары ішкі және сыртқы нарықтарда сұранысқа ие және олардың бағасы тұрақты жоғары деңгейде екенін айтты.

- Мәселен, бидайдың орташа бағасы тоннасына 65-70 мың теңге болса, зығыр және рапс сияқты экспортқа бағытталған дақылдардың бағасы 200 мыңға дейін барады және одан да жоғары, - деді Айдарбек Сапаров.

Еске салсақ Қазақстан 2025 жылы Грузияға 80 мың тонна бидай экспорттайды.