Биыл 7 айда Қазақстан қанша көмір экспорттады

АСТАНА. KAZINFORM — Биылғы 7 айда елде 62 млн тоннаға жуық көмір өндірілді. Бұл туралы ҚР Энергетика министрі Ерлан Ақкенженов мәлім етті.

- Көмір өндіруші кәсіпорындар биылғы 7 айда 61,4 млн тонна көмір өндірді, оның ішінде коммуналдық-тұрмыстық қажеттіліктерге және халыққа 2,2 млн тонна, энергетикалық кешендерге 37,4 млн тонна, өнеркәсіптік кәсіпорындарға 1,6 млн тонна, экспортқа 18,2 млн тонна жөнелтілді, - деді Е. Ақкенженов Үкімет отырысында.

Сонымен қатар ол барлық өңірде алдағы жылыту маусымына дайындық жұмыстары жалғасып жатқаны туралы айтты.

- Көмірмен қамтамасыз ету мәселесіне тоқталсақ, нақты орындау мерзімдерін көрсете отырып, халық пен бюджеттік ұйымдардың көмірге қажеттілігін қалыптастыру жөніндегі жоспар әкімдіктерге орындауға берілді. Мәселен, алдағы жылыту маусымына көмір өніміне қажеттілік шамамен 7,7 млн тоннаны құрайды. Қазір 2,2 млн тонна жеткізілді, бұл жылдық жоспардың 29 пайызы, - деді министр.

Бұдан бұрын хабарланғандай, Үкіметте жылу беру маусымына дайындығы төмен өңірлер аталды.