Биыл Қостанай облысына 8 керқұлан жеткізіледі

АСТАНА. KAZINFORM – ҚР Экология және табиғи ресурстар вице-министрі Нұркен Шәрбиев Қостанай облысына әкелінген керқұландар қалай қыстап шыққаны туралы айтып берді.

Оның сөзінше, өңірдің климаты керқұландарға қолайлы, сол себепті олар жақсы қыстап шықты.

- Жануарлар биыл қыстап шықты. Олар осындай ауа райына үйренген. Оларды жерсіндіруге Қостанай облысының таңдап алынуы да бекер емес. Су тасқыны қаупіне келетін болсақ, жағдай бақылауда, - деді вице-министр Өңірлік коммуникациялар қызметінде өткен брифинг барысында.

Төл алу жағына келетін болсақ, ол жоспарда бар. Аталығы жерсіндіру кезеңінде аналықтарынан бөлек ұсталды.

- Жануарларды биылғы сәуір-мамыр айларында шағылыстырамыз деп отырмыз. Жерсіндіру ерекшеліктеріне байланысты олар бөлек болды, - деп нақтылады ол.

Биылғы мамыр мен маусым айлары аралығында 8 бас жануар жеткізіледі деп отырмыз. Резерватқа әкелінген керқұландардың саны 40-қа жететін болады.

Осыған дейін Қазақстанда Керқұланды жерсіндіруге бағытталған жоспар жүзеге асырыла бастағаны туралы жаздық.