Былтыр 200 инвестициялық дау сотқа жеткен

АСТАНА. KAZINFORM –  Былтыр 200 инвестициялық дау сотқа жетіп, 80 пайыз бизнес пайдасына шешілген.  Бұл туралы Жоғарғы соттың әкімшілік істер жөніндегі сот алқасының төрағасы Аслан Тукиев мәлімдеді.

- 2024 жылы Әкімшілік сотқа инвесторлардан 200 шағым түсті. Соның 80 пайызын соттар инвестордың пайдасына шешті. Бұрын мұндай көрсеткіш ойға сыймайтындай көрінетін. Қазір сот төрелігі саясатындағы өзгерістердің арқасында бұл мүмкін болып отыр. Аталған сандар мәселе баршылық екенін көрсетеді. Оның көбі заңнама мен әкімшілік саясаттағы жүйелік кемшіліктерге байланысты туындайды. Үшінші мәселе – формализм мен бюрократия. Титтей бір түйткіл көрінсе, мемлекеттік органдар шешім қабылдаудан жалтарады. Өйткені жауапкершілік алудан қорқады, - деді ол.

Аслан Тукиев инвесторлардан шағым жиі түсетін салаларды атады.

- Бірінші кезекте Қаржы министрлігі, Өнеркәсіп және құрылыс, Экология министрліктері тұр. Қаржы министрлігінің үстінен, әрине салық мәселесі бойынша жиі шағымданады. Ішінара кедендік даулар бар. Өнеркәсіп және құрылыс министрлігінің үстінен жер қойнауын игеру мәселесі бойынша шағым көп. Мұндағы мәселе заңнамаға байланысты. Бізде жер қойнауын игеруге рұқсатты басқа меморган берсе, инфрақұрлымы мен жерді жергілікті әкімдіктер береді. Осы құжаттардың бәрін жинап шыққанша мерзім өтіп кетіп жатады. Одан кейін неге жұмысқа кіріспей жатырсың деген сұрақтар пайда болады. Мерзім бұзылғаннан кейін мемлекеттік аппарат шешім қабылдауға қорқып одан әрі созады. Инвесторлар сотқа тек мемлекеттік органдарда қайыр болмаған кезде ғана жүгінеді. Сотта қаралатын инвестициялық даулар жыл сайын 10 пайызға өсіп келеді, - деді Жоғарғы сот өкілі.

Еске салсақ, өткен айда «Kazakh invest» ұлттық компаниясы» АҚ осы мәселе туралы арнайы материал жариялаған еді. Онда тікелей шетелдік инвестиция көлемі, елдегі инвестициялық саясатқа қатысты қалыптасқан жағдай мен оған әсер ететін факторлар туралы айтылған.