Былтыр тәжікстандық блогерлер 440 мың доллар салық төлеген

ДУШАНБЕ. KAZINFORM – Былтыр Тәжікстанда ресми тіркелген блогерлер 2,4 млн доллар пайда тапқан, деп хабарлайды Kazinform агенттігінің тілшісі.

Тәжікстанның салық органдарында тіркелген блогерлердің саны кейінгі бір жылда 26-ға көбейіп, биыл 114-ке жетті.

Салық комитетінің мәліметіне сай, 2024 жылы блогерлер 27 млн сомони (шамамен $2,47 млн) пайда тауып, одан мемлекет қазынасына 4,8 млн сомони ($440 мың) салық төлеген.

Ведомстводан атап өткендей, елдегі блогерлердің саны бұдан әлдеқайда көп. Дегенмен мұндай субъектілерді анықтау мен тіркеу процесі көп уақытты талап етеді.

Еске салайық, 2021 жылдан бастап тәжікстандық блогерлер түскен табысынан салық төлеуге міндеттелді. Заңнамаға сәйкес, жеке кәсіпкер ретінде тіркелген блогерге жалпы кірісінің 6% мөлшерінде салық салынады.

Қоса кетсек, кеше 53,3 млрд теңге табысын жасырған қазақстандық блогерлер анықталғанын жазып едік. Тиісінше, ҚР Мемлекеттік кірістер комитеті блогерлерге салық мәселесін шешуге 30 күн беріп отыр.