Бишімбаев марқұм Салтанат Нүкенованың отбасына 17 млн теңге төлейтін болды
АСТАНА. KAZINFORM – Астана қаласының азаматтық істер жөніндегі ауданаралық соты марқұм Салтанат Нүкенованың ағасы Айтбек Амангелдінің экс-шенеунік Қуандық Бишімбаевтан материалдық және моральдық залалды өндіру талабын қарап, шешім шығарды.
Айтбек Амангелді талабында қайғылы оқиға салдарынан моральдық азап шеккенін, денсаулығының нашарлағанын және еңбекке қабілеттілігін жоғалтқанын айтқан.
«Сот парасаттылық пен әділдік қағидаттарын негізге алып, жақын туысының қайтыс болуы сөзсіз талап қоюшының моральдық жағдайына кері әсерін тигізіп, оның жеке мүліктік емес құқықтарын бұзғанын ескере отырып, талап қоюды ішінара қанағаттандырды. Жауапкерден қылмыстық іс бойынша келтірілген 6 877 672 теңге материалдық шығын мен 10 млн теңге моральдық зиян өндірілді», - делінген елорда сотының шешімінде.
Сот шешімі заңды күшіне енген жоқ.
Бұған дейін 24 жылға сотталған экс-министр Қуандық Бишімбаевтың үстінен материалдық және моральдық шығынды өндіру туралы азаматтық іс қозғалғанын жазған едік.
Айта кетсек, бұрынғы Ұлттық экономика министрі Қуандық Бишімбаев жазасын өтеп жатқан мекемеден әзірге жұмыс таппады.
