Биыл тұрмыстық зорлық-зомбылық жайында 125 мыңнан астам хабарлама болды

НҰР-СҰЛТАН. ҚазАқпарат – Жыл басынан бері тұрмыстық зорлық-зомбылық жайында 125 мыңнан астам шағым мен хабарлама келіп түсті. Бұл туралы ҚР Ішкі істер министрлігі Әкімшілік полиция комитеті басқармасының басшысы Жасұлан Байкенов айтты, деп хабарлайды ҚазАқпарат тілшісі.

«Зорлық-зомбылық - бұл даулы әлеуметтік проблема, өйткені ол құрбандардың өздеріне тікелей әсер етіп қана қоймайды, сонымен бірге қоғамды тұрақсыздандырады, әлеуметтік тәртіпке қауіп төндіреді. Зорлық-зомбылықтың ең көп таралған түрлерінің бірі - тұрмыстық зорлық-зомбылық. Жыл басынан бері тұрмыстық зорлық-зомбылық жайында 125 мыңнан астам шағым мен хабарлама келіп түсті», - деді Ж. Байкенов онлайн брифингіде.

Оның айтуынша, осы фактілерді қарастыру кезінде 9 645 адамға қатысты сот олардың тәртібіне ерекше талаптарды бекітті. 40 мыңнан астам адам әкімшілік жауапкершілікке тартылды.

«Жәбірленушілердің қауіпсіздігін қамтамасыз ету мақсатында 70 228 адамға қорғау туралы нұсқау берілді», - деді басқарма басшысы.