БҚО-да «Допинг» жедел алдын алу шарасы барысында 12 құқықбұзушылық анықталды

ОРАЛ. 28 мамыр. ҚазАқпарат - Батыс Қазақстан облысында «Допинг» жедел алдын алу шарасының екінші кезеңі барысында 12 құқықбұзушылық анықталса, соның төртеуі қылмыстық іске жатады.

Облыстық ішкі істер департаментінің баспасөз қызметінен түскен мәліметке қарағанда, 117,37 грамм марихуана, басқа да есірткілік заттар айналымнан алынды. 15 мамыр күні Ақжайық аудандық ауруханасының аға фельдшері Т-ның есірткілік заттарды медициналық мақсатта пайдаланудың ережесін бұзғаны белгілі болды. Тексеру нәтижесінде брюзипам түріндегі психотроптық заттың 2 ампуласы, 0,304 кг мөлшерінде күкірт қышқылы алынды. Сол күні аталмыш ауруханадағы емхананың дәрігер-онкологы О. мен медбике Б. тарапынан да осындай заңбұзушылыққа жол берілгені анықталды.

Осы фактілер бойынша ҚР ҚК 265-бабы 1-бөлімі бойынша қылмыстық іс қозғау мәселесі шешілуде.