Білім беру және денсаулық сақтау ұйымдарында тамақтанудың стандарттары өзгертілді
АСТАНА. KAZINFORM — Денсаулық сақтау министрі 2025 жылғы 4 наурыздағы бұйрығымен денсаулық сақтау және білім беру ұйымдарында тамақтану стандарттарының жаңа ережесін бекітті.
Стандарт денсаулық сақтау және білім беру ұйымдарында тамақтануды ұйымдастырудың жалпы талаптарын белгілейді.
Денсаулық сақтау ұйымдарында тамақтану қалай ұйымдастырылуы керек.
Әрбір денсаулық сақтау ұйымында негізгі, тұрақты қолданылатын диета белгіленеді және қажет болған жағдайда басқа диета қолданылады. Сонымен қатар, арнайы көрсеткіштерге байланысты диетаға белгілі бір түзетулер енгізілуі мүмкін. Диетадағы қосымша өзгерістер немесе шектеулер белгілі бір емдік қасиеттері бар өнімдерді (сүзбе, бауыр, сүт, қарбыз, алма, сарымсақ) енгізу немесе шектеу, сондай-ақ белгілі бір тағамдық өнімнің (ақуыз, май, көмірсу, тұз, дәрумен) мөлшерін көбейту немесе азайту арқылы жүзеге асырылады.
Науқас денсаулық сақтау ұйымына түскен кезде емдік тамақтану кезекші дәрігердің тағайындауымен белгіленеді. Тағайындалған диета ауру тарихына енгізіледі және барлық түскен науқасқа арналған жиынтық тапсырысқа жазылып, белгіленген уақытта асханаға жіберіледі.
Денсаулық сақтау ұйымдарының асханасында қатаң сақталуы тиіс:
— қоғамдық тамақтану және денсаулық сақтау объектілеріне арналған қолданыстағы санитарлық ережелерде көзделген асхананы жабдықтау, санитариялық жағдайды сақтау және тағам дайындау технологиясы бойынша талаптар;
— тамақ өнімдерін сақтау шарттары мен мерзімдері бойынша талаптар;
— ас блогы, тамақ тарату бөлімдері мен буфет қызметкерлерінің міндетті профилактикалық және медициналық тексерулерден өту талаптары.
Білім беру ұйымдарында тамақтану қалай ұйымдастырлуы керек
— Білім беру ұйымының бейініне, білім алушылардың болу уақытына, жас ерекшеліктеріне сәйкес тамақтану тәсілін, формасын, моделін, режимін (жиілігін) және ұйымдастыру кестесін айқындау;
— Тамақтануды ұйымдастыруға қатысатын барлық тараптың, соның ішінде білім беру саласындағы басқару органдарының, білім беру ұйымдарының әкімшілігінің, тамақтану қызметін жеткізушілердің өзара әрекеттестігін қамтамасыз ету;
— Білім беру ұйымдарында тамақтануды ұйымдастыруға жауапты тұлғаларды анықтау;
— Төрт апталық маусымдық перспективалық мәзірді, күнделікті тағам үлесін есептейтін мәзір және күнделікті мәзірді әзірлеу;
— Бюджет қаражаты, жеке немесе басқа жолмен тартылған қаражат есебінен ыстық тамақпен қамтамасыз етілетін білім алушылардың оның ішінде арнайы диеталық қажеттілігі бар балалардың есебін жүргізу;
— Асхана жабдығы мен құралдарын жұмыс жағдайында ұстау, оларды тұрақты жаңарту, жеткілікті мөлшерде ыдыс-аяқ, жиһаз, үздіксіз энергия мен сумен жабдықтау, сонымен қатар су бұру, желдету және ауа баптау жүйелерінің тұрақты жұмысын қамтамасыз ету;
— Тамақтануды ұйымдастыру бойынша есепке алу және есеп құжаттамасын жүргізу;
— Азық-түлік өнімдері мен дайын тағамдардың сапасы мен қауіпсіздігіне, тамақтануды ұйымдастыруға, Қазақстан Республикасының тамақ өнімдерінің қауіпсіздігі және санитарлық-эпидемиологиялық саласындағы заңнамасын сақтауға өндірістік бақылауды жүзеге асыру.
Денсаулық сақтау және білім беру ұйымдарында тамақтану стандарттарымен толығырақ сілтемеге өтіп танысуға болады.
Айта кетсек, жыл басында мамандар оқушылардың дұрыс тамақтануының перспективалық мәзірін әзірледі.
