Бопсалауға, қорқытуға тез көнгіш – маман жасөспірімдердің есірткі таратуы туралы

АСТАНА. KAZINFORM – Елімізде 14 жастан асқан балалардың есірткі тасымалдағаны бойынша бірнеше дерек тіркелді. Оларға қандай шара қолданылады? 

ІІМ Есірткі қылмысына қарсы іс-қимыл комитетінің аса маңызды істер жөніндегі аға жедел уәкілі Медетбек Смағұловтың айтуынша, есірткі тасымалдаушылардың көбі – 16-32 жастағылар.

– Бірақ қазір 14 жастан асқан балалардың да есірткі тасымалдағаны туралы бірнеше факт тіркелді. Өйткені, олар бопсалауға, қорқытуға тез көнгіш. Бізде адам құқыларының жалпыға бірдей декларациясы бар. Ол жерде 18 жасқа дейінгі азаматтар бала деп есептеледі. Дегенмен есірткі тасымалымен айналысқан жағдайда 16 жастан бастап қылмыстық жауапкершілікке тартылады. Ал егер аса ауыр қылмыс жасап, тармақтары нақты анықталатын болса, 14 жастан бастап қылмыстық жауапкершілікке тартылады, - дейді спикер.

Сондай-ақ Медетбек Смағұлов жастар арасында кең тараған есірткі түріне де жеке тоқталды.

– Есірткі түрлерінің арасында әлемге көп тарағаны - синтетикалық өнім. Бұл - каннабистік өнімнің орнына келген дәрі-дәрмектік деңгейдегі препараттар.
Синтетикамен күресу өте қиын. Біз бұрын каннабистік есірткінің бағыт-бағдарын, жолын білетін едік. Қазір синтетикалық есірткі кез келген үйде дайындала береді. Формулаларын дайындап, прекурсорларын алатын болса, жеткілікті.

Синтетикалық есірткі – өте ауыр өнімдердің бірі. Екінші қолданғаннан-ақ адам тәуелді болып қалады. Синтетикалық есірткіні жоюға ата-аналар да белсенді араласу керек. Өйткені жастардың арасында өте көп тарап келе жатыр, - дейді Медетбек Смағұлов. 

Айта кетсек, жақында полиция қызметкерлері бір күн ішінде Батыс Қазақстан, Солтүстік Қазақстан және Қарағанды облыстарында орналасқан үш есірткі зертханасын жойды.