Бірыңғай зейнетақы қорында қанша жинақ бар
АСТАНА. KAZINFORM – Бірыңғай жинақтаушы зейнетақы қорының былтырғы таза инвестициялық кірісі 3,36 трлн теңгеден асты. Толығырақ қордың ресми сауалға жауабында айтылған.
– 2025 жылдың 1 қаңтардағы есеп бойынша Бірыңғай жинақтаушы зейнетақы қорындағы салымшылардың жеке зейнетақы шотының саны 12,50 млн асты. Оның ішінде 11,15 млн астамы міндетті зейнетақы жарнасына арналған шот, шамамен 715,52 мыңы міндетті кәсіптік зейнетақы жарнасы шоты және 439,58 мыңы ерікті зейнетақы жарнасы шоты ашылған, - делінген сауал жауабында.
Айта кетсек, былтырдан бастап елімізде жұмыс берушілер жұмысшыға зейнетақы жарнасын төлеуге міндеттелді. Бұл бағытта қордағы зейнетақы шоттарының саны 4,67 млн асқан.
- Салымшылардың жеке және шартты шоттарына былтыр түскен зейнетақы жарналарының мөлшері 2,79 трлн теңгеге жуық. Бұл - 2023 жылмен салыстырғанда 29% артық, - деп хабарлайды қордан.
Бірыңғай жинақтаушы зейнетақы қорындағы барлық жарна оң сипатқа ие:
- Жеке зейнетақы шоттарына былтыр жыл бойы 2,44 трлн теңгеден астам жарна түсті (2023 жылмен салыстырғанда 18,3% артық);
- Міндетті кәсіптік зейнетақы жарнасы 113,6 млрд теңге (өсім 18,9%);
- Ерікті зейнетақы жарнасы 3,07 млрд теңге (өсім 32,50%) жиналды;
- Жұмыс берушілер жұмысшыға зейнетақы жарнасы шамамен 231,24 млрд теңге.
- 2025 жылғы 1 қаңтардағы жағдай бойынша Бірыңғай жинақтаушы зейнетақы қорындағы зейнетақы жинақтарының көлемі шамамен 22,80 трлн теңгеге жетті. Сонымен қатар былтыр инвестициялық кіріс 3,36 трлн теңгеден асты. Оның көлемі 2023 жылмен салыстырғанда 1,79 трлн теңгеге (114,5%) артық, - делінген ресми хабарламада.
Бұған дейін Бірыңғай жинақтаушы зейнетақы қоры «Нұрбанк» АҚ сотқа беріп 120,4 млн теңге дивиденд өндіріп алғаны туралы хабарлаған едік.
Айта кетсек, Мемлекет басшысы Қасым-Жомарт Тоқаев биыл Үкіметтің кеңейтілген отырысында Қор қаржысын стратегиялық жобаларға тарту туралы да пікір білдірген еді.
Сондай-ақ агенттік тілшісі мемлекет Бірыңғай жинақтаушы зейнетақы қорындағы қазақстандықтардың ақшасын Ұлттық банк арқылы қалай басқарып отырғанына шолу жасады.
Одан бөлек Қаржы нарығын реттеу және дамыту агенттігінің өкілі БЖЗҚ-дағы ақшасы азайып қалғанына шағымданған салымшыларға кеңес берді.
