Бүгін түнде екі облыста қар құрсауында қалған 28 адам құтқарылды

АСТАНА. KAZINFORM – Бүгін түнде Солтүстік Қазақстан облысы Шал ақын ауданында, Ступинка мен Семиполка ауылдарының арасында қар жауып, жолды басып қалуы салдарынан бірнеше автокөлік жолда қалып қойды.

ҚР Төтенше жағдайлар министрлігі баспасөз қызметінің хабарлауынша, оқиға орнына жедел түрде ТЖМ құтқарушылары мен жергілікті атқарушы органдардың өкілдері жетті. Қар құрсауында қалған 7 жеңіл автокөлік шығарылып, олардың ішінде болған 20 адам, соның ішінде 3 бала құтқарылды.

Көліктер тазартылған жол бөлігіне сүйреліп шығарылып, адамдар жақын маңдағы елді мекендерге дейін жеткізілді.

Зардап шеккендер жоқ, ешкімге медициналық көмек қажет болған жоқ.

Сондай-ақ Ақтөбе облысының Әйтеке би ауданында, Ақтасты ауылынан 30 шақырым жерде екі жеңіл автокөлік қар құрсауында қалып қойды.

Оқиға орнына жедел жеткен ТЖМ құтқарушылары жол талғамайтын техниканың көмегімен 8 адамды эвакуациялап, оларды Толыбай елді мекеніне жеткізді. Зардап шеккендер жоқ, медициналық көмек қажет болған жоқ.

Айта кетейік, бүгін Қазгидромет еліміздің бірқатар өңірінде ауа райына байланысты ескерту жасады.