«Балдәурен» орталығында балалар санитарлық талаптарға сай емес, тар жерде тұрып келген

КӨКШЕТАУ. KAZINFORM - Бурабай ауданының прокуратурасы «Балдәурен республикалық оқу-сауықтыру орталығы» РМҚК қызметіне тексеру жүргізіп, санитарлық-эпидемиологиялық талаптардың жүйелі бұзылуын және лагерьдің жобалық қуатының асыра пайдаланылғанын анықтады.

Ақмола облыстық прокуратурасының мәліметтеріне қарағанда, техникалық паспортқа сәйкес, орталық 400 орынға арналған. Алайда іс жүзінде бір ауысымда 574 бала орналастырылған, бұл рұқсат етілген нормадан 43%-ға артық.

Балаларды орналастыру үшін 12 оқу кабинеті пайдаланылған. Бұл бөлмелер санитарлық тораптармен жабдықталмаған, гигиеналық талаптарға сай келмейді және кәмелетке толмағандардың денсаулығына қауіп төндіреді. Норма бойынша бір бөлмеде 6 бала болуы тиіс болса, іс жүзінде 9 балаға дейін орналастырылған.

Айрықша назар аудартатыны – мемлекеттік квота есебінен тегін демалып жатқан балалар тар және қолайсыз бөлмелерде орналасса, ал ақылы негізде келген балалар бөлек, барлық жағдайы жасалған бөлмелерге жайғастырылған.

- Анықталған заңбұзушылықтарды жою, кінәлі тұлғаларды жауапқа тарту және болашақта балалардың өмірі мен денсаулығына қатер төндірмеу үшін прокурорлық қадағалау шаралары қабылданды,- делінген хабарламада.

Осыған дейін Алматы прокуратурасының Мемлекеттік кірістер департаменті ғимаратының бір бөлігін қайтарып алғаны туралы жаздық.