Димаш Құдайберген жанкүйерлеріне алғыс айтты
АСТАНА. KAZINFORM — Әнші Димаш Құдайберген 7 наурыз күні тыңдармандарына жол тартқан жаңа туындысының қараламы көбейіп жатқанына байланысты алғыс білдірді.
— Жаңа бейнебаяныма қолдау көрсеткен барша жанкүйерлеріме алғыс айтқым келеді. Пікірлерге қарағанда, менің шетелдік тыңдармандарымның белсенділігінің арқасында жаңа бейнебаянымыздың таралымы мен қаралымы көбейіп жатыр, — деп жазды ол әлеуметтік желідегі парақшасына.
Сондай-ақ, жақын арада бейнебаянның екінші бөлімін аяқтайтынын айтты.
— Жақын достарыма @llightproduction жасаған жұмыстарыңыз үшін алғысымды айтамын, — деді Димаш.
Еске сала кетейік, бұған дейін Димаш Құдайберген әлемге әйгілі композитормен жазған алғашқы туындысын көпшілікке ұсынған болатын. Бұл — Грэмми сыйлығының екі дүркін иегері, әлемге әйгілі продюсер әрі композитор Уолтер Афанасьевпен алғашқы туындысы болатын.
