Электрондық сауда: Жаңа заңда маркетплейске де жауапкершілік жүктелетін болады
АСТАНА.KAZINFORM – Алдағы уақытта электрондық сауда саласында жауапкершілік онлайн сатушыларға ғана емес, маркетплейс әкімшілігіне де жүктелетін болады. Бұл туралы ҚР СИМ Тұтынушылардың құқықтарын қорғау комитеті төрағасының орынбасары Серік Құсайынов айтты.
– Жаңа заңда электрондық сауда саласында тұтынушылар құқығын қорғау бойынша нормалар күшейтіледі. Негізі, электрондық сауда саласында да, кәдімгі сауда-саттық саласында да тұтынушы құқығын қорғау принциптері бірдей. Тек тауарды онлайн сатып алу кезінде біз сатушыны тірідей көрмейміз және соның кесірінен кейбір жағдайларды толық қадағалау мүмкін емес. Сондықтан ендігіде бұл салада сатып алушының құқығы бұзылатын болса, сол онлайн сауда алаңының әкімшілігі тауар сатушыға шара қоланады. Сол үшін электрондық сауда алаңы «сауда объектісіне» теңестіріледі. Ол дегеніміз, мәселен, Kaspi.kz дүкенінен адам тауар сатып алып, оның сапасына көңілі толмаса және оны қайтаруға тауар сатушы келіспесе, онда сол Kaspi.kz онлайн платформасының әкімшілігі өзіне тіркелген тауар сатушымен тікелей жұмыс істейді деген сөз, - деді ол.
Спикер адамдар маркетплейс пен сонда тіркелген сатушыны жиі шатыстыратынын айтты.
– Маркетплейс - Kaspi.kz, Оzon.kz, Wildberries секілді онлайн сауда платформалары. Олар тек сату алаңын ұсынады, ал тауарды сонда тіркелген сатушы жүзеге асырады, - деп нақтылады Серік Құсайынов.
Еске сала кетсек, елімізде 2023 жылдың қыркүйегінен бері Тұтынушылардың құқығын қорғау туралы жаңа заң жобасы қаралып жатыр. Қазір ол Мәжілістің қарауында.
Бұған дейін тұтынушылар жаңа заң қабылданған соң 4 сатылы шағымдану кезеңдерінен өтпестен, бірден сотқа жүгіне алу мүмкіндігі енгізілетіні жайлы жазған едік.
Сондай-ақ елімізде тұтынушылар құқығын қорғау омбудсмені институты құрылады.
