Елордада есірткіге тәуелді қанша адам есепте тұр

АСТАНА. KAZINFORM – Астана қаласының денсаулық сақтау басқармасының мәліметі бойынша биыл есірткі қолданатын 971 адам тіркелген, оның ішінде тәуелді жандар бөлек есепке алынған. Бұл туралы толығырақ Астана қаласы әкімінің орынбасары Есет Байкен айтты.

- Елорда әкімі «Астана – есірткісіз қала» атты 2023-2025 жылдарға арналған жоспарды бекітті. Оның аясында есірткімен күреске бағытталған 92 іс-шара қарастырылған. Қалалық денсаулық сақтау басқармасының мәліметі бойынша, биыл 971 есірткі қолданатын адам тіркелген, бұл өткен жылмен салыстырғанда 1,2%-ға төмен. Сонымен қатар 279 адам есірткіге тәуелділіктен арылған, яғни емделген және 70 есірткіге тәуелді жан есепке алынды – деді Есет Байкен қалалық мәслихаттың жастар саясатына арналған кезекті сессиясында.

Әкім орынбасарының айтуынша, есірткімен күрес бағытында қалада 40 акция ұйымдастырылды.

- Профилактикалық іс-шараларға үкіметтік емес ұйым өкілдері, мәслихат депутаттары, блогерлер және құқық қорғау органдарының мамандары қатысты. Сол сияқты Zoom платформасында кәсіби психологтардың қатысуымен онлайн тренингтер өтті, - дейді ол.

Еске сала кетсек, таяуда пара алып, есірткі сақтаған елорда әкімдігінің қызметкері айыппұл арқалаған еді.