Эмомали Рахмон Наурыз мерекесіне орай 897 сотталушыға рақымшылық жасады

АСТАНА. KAZINFORM - 20 наурызда Тәжікстан президенті Эмомали Рахмон «Бас бостандығынан айыруға сотталғандарға рақымшылық жасау туралы» жарлық шығарды, оған сәйкес 897 сотталушы жазасын одан әрі өтеуден босатылады, деп хабарлайды ТР президентінің баспасөз қызметі.

Жарлық Халықаралық Наурыз мерекесіне орай және «Тәжікстан Республикасы Конституциясының 69-бабына сәйкес» қабылданды.

Құжатқа жасалған қысқаша түсініктемеде рақымшылық жасау актісі «адамгершілік, отбасыларға, балалар мен жасөспірімдерге қамқорлық жасау қағидаттарына негізделген» делінген.

«Халықаралық Наурыз мерекесі қарсаңында 897 сотталушы рақымшылыққа ілініп, жазасын одан әрі өтеуден босатылады. Бұл жарлық жеңіл, орташа және ауыр қылмыстар жасағаны үшін бас бостандығынан айырылған және түзеу мекемелерінде жазасын өтеп жатқан сотталғандарға қатысты», - деп түсініктеме берді ТР президентінің баспасөз қызметі құжатқа қатысты.

Жарлыққа рақымшылық жасалған адамдардың тізімі қоса беріледі, бірақ ол әлі жарияланған жоқ. Сондай-ақ нақты қандай қылмысы үшін сотталғандар жазадан босатылатыны белгісіз.

Еске сала кетейік, Өзбекстан, Қырғызстан және Тәжікстан президенттері Наурыз мерекесін бірге тойлайды.