Енді құмар ойынға әуес мемлекеттік қызметкерлерді автоматты түрде анықтайды

АСТАНА. KAZINFORM — Қазақстанда бәс тігетін, ойынқұмар мемлекеттік қызметкерлерді арнайы жүйе арқылы анықтайды. Бұл туралы Туризм және спорт вице-министрі Ержан Еркінбаев мәлім етті. 

— Арнайы жүйе құрастырылады, өйткені қолмен теріп анықтау мүмкін емес, себебі тәулік ішінде 50 мыңға жуық өтінім түседі. Оның ішінде мемлекеттік қызметкер ме, борышкер ме немесе әскери қызметкер ме бір сағаттың немесе бір күннің ішінде анықтау мүмкін емес. Сондықтан біздің министрлік автоматтандырылған жүйе әзірлеп жатыр, — деді Ержан Еркінбаев Сенатта өткен баспасөз мәслихатында.

Вице-министрдің мәлімдеуінше, аталған жүйе 3-4 айдың ішінде іске қосылады және оның көмегімен бәс тіккен немесе ойынқұмар адамның кім екенін жедел анықтауға болады.

— Ал әзірге әр ойын субъектілері қолмен тексеріп жатыр, — дейді ол.

Сондай-ақ, министрдің орынбасары бәс тігетіні анықталған мемлекеттік қызметкердің жұмыстан қуылатынын тілге тиек етті.

Айта кетейік, бүгін Сенаттың Әлеуметтік-мәдени даму және ғылым комитетінің депутаттары ойын бизнесі және елімізде лотереяға қатысты қабылданған заңнамаға енгізілген өзгерістерді іске асыру барысын талқылады.

Еске сала кетсек, қазақстандықтар өзін 10 жылға дейін құмар ойындардан шектей алады.