Энергетика министрі электр желілерін жөндеу уақытылы аяқталады деп уәде берді

АСТАНА. KAZINFORM — ҚР Энергетика министрі Ерлан Ақкенженов электр станцияларындағы жөндеу жұмыстарына түсінік берді.

- Алдағы жылыту маусымына дайындық аясында жүйелік оператор бекіткен кестеге сәйкес, биыл электр станцияларында 10 энергия блогын, 63 қазандықты және 39 турбинаны жөндеу жоспарланған. 4 энергия блогында, 31 қазандықта және 20 турбинада жөндеу жұмыстары әртүрлі кезеңдерде іске асып жатыр. 5 энергия блогында, 22 қазандықта және 12 турбинада жөндеу жұмыстары аяқталды. Энергетикалық көздер бойынша жөндеу жұмыстарына 376,7 млрд теңге игеру жоспарланған, бұл былтырғы деңгейден 13 пайызға жоғары, - деді Е. Ақкенженов Үкімет отырысында.

Оның айтуынша, аймақтық электр желілік компаниясының желілерінде жалпы ұзындығы 17 мың км электр энергиясын беру желісін, 420 қосалқы станцияны, 3,5 мың тарату пунктін және трансформаторлық қосалқы станцияларды жөндеу жоспарланған.

Электр энергиясын беру желілерінің 77 пайызы қосалқы станциялардың 68 пайызы және тарату пункттері мен трансформаторлық қосалқы станциялардың 73 пайызы жөнделді.

- Жылумен жабдықтау желілерінде 323 км жылу беру желісін реконструкциялау және күрделі жөндеу бойынша жұмыстар жоспарланған. 215 км немесе 66% орындалды. Барлық жөндеу жұмыстары мерзімінде аяқталады, - деді министр.

Бұдан бұрын хабарланғандай, Үкіметте жылу беру маусымына дайындығы төмен өңірлер аталды.