Ердоғанның басты қарсыласын тұтқындауға ордер берілді

АСТАНА. KAZINFORM – Ыстанбұл мэрі және Түркия президенті Режеп Тайып Ердоғанның басты саяси қарсыласы Экрем Имамоглуды қамауға алу туралы ордер шықты. Бұл туралы Sabah басылымы хабарлады. 

Басылымның мәліметінше, жемқорлыққа қарсы операция аясында Имамоглу мен оның баспасөз хатшысы Мұрат Онгунды және тағы 100-ге жуық адамды қамауға алу туралы шешім қабылданған. Қала мэрінің үйінде де тінту басталды. 

— Операция аясында Ыстанбұл мэрі Экрем Имамоглу мен оның баспасөз кеңесшісі Мұрат Онгунды қамауға алу туралы ордер берілді. Сондай-ақ журналистер мен кәсіпкерлер де бар 100-ге жуық адам тергеуде. Операцияның Medya A.Ş компаниясындағы мемлекеттік сатып алуларға және Күрдістан Жұмыс партиясы арасында жасалған «қалалық келісімге» қатысты екені айтылды. Имамоглының Сарыердегі үйінің төңірегінде іздестіру шарасы жүргізілді, - делінген хабарламада.

18 наурызда Ыстамбұл университеті Имамоглының дипломын қайтарып алғанын хабарлады. Диплом берудегі қателікке байланысты қабылданған бұл шешім Имамоглуды Түркия заңы бойынша президенттік сайлауға түсу құқығынан айырады. Оған себеп ретінде Имамоглудың 1990 жылы Солтүстік Кипр университетінен Стамбул университетіне заңсыз ауыстырылғаны көрсетілген.

Түркия заңы бойынша президенттік сайлауға түсу үшін жоғары білім қажет, сондықтан бұл шешім Имамоглуды сайлауға қатысу құқығынан айырады. Онымен бірге тағы 27 адамның дипломы да жарамсыз деп танылды.

Түркияның негізгі оппозициялық партиясы Республикалық халық партиясы бұл шешімге парламент деңгейінде наразылық білдірді. Бұған жауап ретінде Ыстанбұл университеті Түркияның жоғары білім беру кеңесі (YÖK) Имамоглудың дипломын жалған деп тауып, сол себепті күшін жойғанын хабарлады. Бұл мәселеге қатысты барлық құжат қосымша тергеу үшін Ыстанбұл прокуратурасы мен YÖK-ке беріледі.

Айта кетейік, Ердоған қайтадан президент сайлауына түсуі мүмкін екенін білдірген болатын.