Есіл бойындағы Бұзылық қарымта реттегішін салуға 120 млрд теңге қажет
АСТАНА. KAZINFORM – Премьер-министрдің орынбасары Қанат Бозымбаев Мәжіліс депутатының сауалына жолдаған жауапта мемлекет Есілдің арнасынан асқан суды көктем мен күзде қалай реттейтіні айтылған.
- Су саласын дамытудың 2024 – 2028 жылдарға арналған кешенді жоспары бойынша Есіл өзенінде қарымта реттегіш салу (Бұзылық) жоспарланған. Есіл қарымта реттегіші 800 млн текше метрден тасқын су мен қар суын жинақтап, реттейді, - деп жазылған жауапта.
Қанат Бозымбаев бұл гидронысан етектегі Сергеев және Петропавл су қоймаларының жұмысын тұрақтандыруға қолданылатынын айтады.
- Жобалық-сметалық құжаттаманы әзірлеу жұмыстары 2024 жылдың қараша айында аяқталып, мемлекеттік сараптамаға жіберілді. Сараптама қорытындысы 2025 жылдың наурыз айында беріледі деп белгіленген. Құрылыс-монтаждау жұмыстарының жалпы құны шамамен 120 млрд теңге болады. Жобаны іске асыру мерзімі 2026–2028 жылдар, - деп жазады вице-премьер.
Бұған дейін Орал қаласы мен Қаратөбе ауданының әкімдеріне тасқынға қарсы жұмысты жөнді жүргізбегені үшін сөгіс жарияланған еді.
