EURO 2024: Румыния мен Бельгия плей-офф сатысына шықты

АСТАНА. KAZINFORM — Футболдан 2024 жылғы Еуропа чемпионатында Румыния мен Бельгия плей-офф сатысына шықты.

26 маусымда алдымен Е тобындағы құрамалар сынға түсті.

Олардың бәрінің жарысты жалғастыруға мүмкіндігі бар еді.

Құрамалар бір-бірден жеңіске жетіп, үш ұпайдан олжалаған-ды. Десе де Румыния мен Бельгияның доп айырмасы жақсы болатын.

Румыния үшінші турда Словакиямен кездесті. Ойын барысында 24-минутта словакиялық Ондрей Дуда есеп ашты. 

Ал 37-минутта румыниялық Рэзван Марин пенальтиден мүлт кеткен жоқ. 

Құрамалар 1:1 есебіне қанағат білдірді.

Тағы бір кездесуде Украина мен Бельгия құрамалары ойнады. 

Бельгиялық футболшылар үшін бүгінгі ойында тең түссе, плей-офф сатысына жолдаманы қалтаға басатын. 

Ойын барысында есеп ашылған жоқ. Құрамалар 0:0 есебіне қанағат білдірді.

Бұл топта барлық құрама төрт ұпайдан жинады.

Доп айырмасы бойынша Румыния мен Бельгия плей-офф сатысына жолдама алса, үшінші орында тұрған Словакия үздік көрсеткішімен жарысты жалғастыра алады.

Енді 00.00-де F тобында Грузия мен Португалия, Чехия мен Түркия кездеседі. 

Қазірге дейін плей-офф сатысына Швейцария, Италия, Германия, Дания, Англия, Испания, Франция, Португалия, Австрия құрамалары жолдама алды. 

Еске салсақ, бұдан бұрын D тобында Австрия Нидерландтан 3:2 есебімен басым түссе, Франция мен Польша 1:1 есебімен тең ойнады.