Еуроодақ Орта дәліздің әлеуетіне қызығушылық білдіріп отыр— өзбекстандық сарапшы
ТАШКЕНТ. KAZINFORM — Еуропалық Одақ елдері Орталық Азиямен байланысты нығайту үшін Орта дәліздің әлеуетіне қызығушылық білдіріп отыр. Таяуда өтетін «Орталық Азия — Еуроодақ» саммитіне қатысты пікір білдірген Өзбекстан Ғылым академиясы Мемлекет және құқық институтының аға ғылыми қызметкері Равшан Назаров осылай мәлім етті, деп хабарлайды Kazinform агенттігінің меншікті тілшісі.
— Орталық Азия елдері бүгінге дейін Еуроодақпен екіжақты қарым-қатынас негізінде ынтымақтастықты ілгерілетіп келеді. Бұл ретте жоспарланып отырған кездесудің форматы өзгеше. Еуроодақтың нақты жоспары бар. Атап айтқанда, еуроаймақ елдері Орталық Азияның көлік-логистикалық инфроқұрылымын дамытуға, тиісінше оған қосылуға мүдделі. Оның ішінде Еуропа Орта дәліздің әлеуетіне қызығушылық білдіріп отыр, — деді Равшан Назаров.
Сарапшының пайымынша, осы мүмкіндікті ұтымды қолдану қажет. Яғни, Транскаспий көлік дәлізін дамыту жобаларына инвестиция тарту маңызды. Тиісінше, Орта дәліз арқылы Орталық Азияның экспорттық әлеуеті артады.
Сонымен қатар Равшан Назаров өңірдегі су тапшылығы мәселесін шешу үшін бірлескен жобаларға Еуроодақ елдерін тартып, солардың тәжірибесін пайдаланудың орындылығына тоқталды.
— Еуроодақ ұсыныстарының бірі — жасыл энергия көздерін дамыту. Бұл — әлемдік тренд. Осы орайда, Еуропалық Одақ күн, жел және судан өндірілетін энергияның үлесін арттыру жолында Орталық Азия елдеріне инвестиция құюға ниет білдіріп отыр. Сонымен қатар, Өзбекстан, Қазақстан және Түрікменстанда су тапшылығы мәселесі өзекті. Сондықтан су үнемдеу технологияларын енгізу мен су ресурстарын басқару жүйесін жетілдіру қажет. Аталған бағытта Еуропалық Одақ елдерінің тәжірибесі мол. Тиісінше, бірлескен жобаларды қолға алып, тіршілік нәрінің тапшылығы мәселесін шешуге болады. Белді сарапшылар осы саладағы серіктестікті ынтымақтастықтың маңызды бағыты ретінде қарастырып отыр, — деп түйіндеді Равшан Назаров Kazinform тілшісінің сауалына жауап бере отырып.
Айта кетейік, Еуроодақ Орталық Азияның негізгі сыртқы сауда серіктестерінің үштігіне кіреді. Сонымен қатар, өңір елдеріне бағытталған барлық инвестицияның 40%-дан астамы ЕО-ға мүше мемлекеттердің үлесінде.
Бұған дейін Kazinform агенттігіне сұхбат берген Өзбекстанның бұрынғы Сыртқы істер министрі Саидмухтор Саидкасымов Орталық Азияның әлемдік саясаттағы салмағы арта түскенін айтып еді.
Еске салайық, «Орталық Азия — Еуропалық Одақ» саммиті 3-4 сәуір аралығында Өзбекстанның Самарқан қаласында өтеді. Оған Еуропалық кеңестің президенті Антониу Кошта мен Еуропалық комиссияның президенті Урсула фон дер Ляйен және Орталық Азия елдерінің мемлекет басшылары қатысады.
Саммит Орталық Азия мен Еуропалық Одақ арасындағы ынтымақтастықты тереңдету мәселелеріне арналады. Оның барысында көлік-логистикалық жобаларды бірлесіп қолға алу, стратегиялық шикізат бағытындағы серіктестік, экологиялық таза және тиімді энергия өндіру көздерін енгізу мүмкіндіктері талқыналады.
