Филиппинде лай көшкін 7 адамның өмірін қиды

АСТАНА. KAZINFORM — Филиппиннің оңтүстігінде толассыз жауған жаңбыр салдарынан лай көшкін жүріп, 7 адам көз жұмды, деп хабарлайды БЕЛТА.

Елде толассыз жауған жаңбырдың кесірінен екі мәрте көшкін жүріп өтті. Филиппиннің оңтүстік-шығысында су тасқынынан 3 мыңнан астам ауыл тұрғыны үйлерін тастап кетуге мәжбүр болды.

Шығыс Давао провинциясының жағалауындағы Мати қаласында көшкін бір үйді басып қалып, ерлі-зайыпты мен олардың екі қызы қайтыс болды. Бұл туралы төтенше жағдайлар қызметі мен провинциялық билік өкілдері хабарлады.

— Құтқарушылар қаза тапқандардың мәйітін шығару үшін жер қазу техникасын пайдаланды, — деді азаматтық қорғаныс басқармасының аймақтық директоры Эднар Даянхиранг.

Давао-де-Оро провинциясының алтын өндіретін Монкайо қаласын бейсенбі күні кешке қарай көшкін басып қалған. Онда үш адам мерт болып, мәйіттер үйінділер арасынан табылды.

Даянхирангтың мәліметінше, соңғы күндері қатты жауған жаңбырдан 10 мыңға жуық адам зардап шекті, оның ішінде 3 200-ден астамы уақытша баспаналарға көшуге немесе туыстарының үйінде тұруға мәжбүр болды.

— Бірнеше шалғай провинциялар мен қалаларда мектептер мен мекемелердің жұмысы тоқтатылды, — деп қосты ол.

Синоптиктердің айтуынша, қатты жаңбыр мен найзағай әдетте маусым айында басталатын тайфуннан бұрын болғанын және суық желдің Тынық мұхитынан келетін жылы және ылғалды ауамен өзара әрекеттесуінен туындаған.

Жыл сайын жер сілкінісі мен жанартау атқылауы жиі болатын Тынық мұхитындағы «Отты сақина» деп аталатын Филиппин архипелагында шамамен 20 тайфун мен тропикалық дауыл соғады. Бұл Оңтүстік-Шығыс Азия мемлекетін әлемдегі апатқа бейім елдердің біріне айналдырады.

Былтыр қараша айында Филиппиндегі тайфуннан 200-ден астам адам мерт болды. Елдің астан-кестеңін шығарған «Калмаэги» тайфунынан 2,9 миллион адам зардап шекті.