Футболдан бірінші лигада алғашқы айналым аяқталды
НҰР-СҰЛТАН. ҚазАқпарат - Футболдан бірінші лига командалары арасындағы Қазақстан чемпионатында алғашқы айналым мәресіне жетті, деп хабарлайды ҚазАқпарат тілшісі.
Естеріңізге сала кетелік, командалар екі конференция бойынша сынға түсіп жатыр. Екеуінде де жеті-жетіден команда бар.
Бірінші конференцияда жетінші турда «Байқоңыр» «Екібастұздан», «Арыс» «Мақтаралдан» - 2:1, «Ақтөбе» «Алтайдан» - 2:0 есебімен басым түсті. Көш басында 14 ұпаймен «Ақтөбе» келеді.
Одан кейінгі орындардағы «Қыранның» - 13, «Арыстың» - 10, «Мақтаралдың» - 7, «Алтай» мен «Екібастұздың» бес-бестен ұпайы бар. Ал «Байқоңыр» 4 ұпаймен көш соңында тұр.
Екінші конференцияда жетінші турда «Атырау» «Ақжайықты», «Қайрат-Жастар» «Шахтер-Болатты» - 1:0, «Жетісу Б» СДЮСШОР №8 клубын 2:1 есебімен жеңді.
Турнир кетесінде алғашқы үштікте «Атырау» - 16, «Ақжайық» - 11, СДЮСШОР №8 клубы - 10 ұпаймен келеді.
Одан кейінгі орындардағы «Академия Оңтүстікте» - 9, «Жетісу Б» клубында - 8, «Қайрат-Жастарда» - 4, «Шахтер-Болатта» - 1 ұпайдан бар.
