Футболдан бірінші лигада «Елімай» қатарынан алтыншы мәрте жеңіске жетті

АСТАНА. ҚазАқпарат - Бүгін футболдан бірінші лига командалары арасындағы ел біріншілігінің 7-туры мәресіне жетті, деп хабарлайды ҚазАқпарат тілшісі.

Турнир кестесінде көш басында келе жатқан Семейдің «Елімай» командасы бұл жолы да сүрінген жоқ. Сырт алаңда «Ақтөбе жастарды» 5:0 есебімен сүріндірді. Осылайша қатарынан алтыншы мәрте жеңіске жетті. Нәтижесінде турнир кестесінде екінші орында келе жатқан елордалық «Жеңіс» клубынан төрт ұпайға алда келеді. «Жеңіс» клубы сырт алаңда «Таразды» 4:0 есебімен тізе бүктіріп, жағдайын жақсарта түсті.

Түркістан облысының «Арыс» клубы жанкүйерлерді таңғалдырып тұр. Қазір үшінші орында келе жатқан команда сырт алаңда Оралдың «Ақжайығын» 1:0 есебімен қапы қалдырды.

Аталған турдағы өзге ойын нәтижелері төмендегіше: «Астана-2» - «Оңтүстік академиясы» 0:3, «Тұран» (Түркістан) - «Хан тәңірі» (Алматы) 1:0, «Жас Қыран» (Алматы) - «Қыран» (Шымкент) 4:2, «Түркістан» - «Екібастұз» 4:3.

Енді 8-тур ойындары 19 мамыр күні өткізіледі.

Еске салсақ, бұдан бұрын футболдан Премьер-лига командалары арасындағы ел біріншілігінің 9-туры мәресіне жетті.