Футболдан Қазақстан чемпионатында «Тобыл» мен «Қайрат» тең ойнады

Бұл күнгі басты кездесу Қостанайда «Тобыл» мен Алматының «Қайраты» арасында өтті.
Матч барысында қарқынды ойын өрбіді. Көш басында қатар келе жатқан қос клуб терезесі тең деңгейде шеберлік көрсетті.
Есепті 6-минутта алматылық командадан Хосе Канте ашса, оған қостанайлық қорғаушы Сергей Малый 45-минутта бір голмен жауап қайырды.
Екінші кезеңде «Тобыл» шабуылшысы Зоран Тошич 72-минутта командасын алға шығарды. Ойынның соңғы минутында оның әріптесі Владислав Васильев өзінің қақпасына гол соғып алды.
Осылайша командалар 2:2 есебіне қанағат білдірді.
Бұған дейін хабарлағанымыздай, бүгін елордалық «Астана» сырт алаңда Оралдың «Ақжайығына» 0:1 есебімен жол берді.
Ақтауда жергілікті «Каспий» «Атырауды» 2:1 есебімен тізе бүктірсе, Түркістанда «Тұран» мен Шымкенттің «Ордабасы» клубы 0:0 есебімен тең түсті.
Аталған турдағы екі ойын ертең, 17 сәуірде өткізіледі. Бұл күні «Мақтарал» (Түркістан облысы) мен «Ақсу» (Павлодар облысы), «Тараз» бен «Шахтер» (Қарағанды) командалары шеберлік байқасады.