Футзалдан Қазақстан құрамасы Тәжікстанмен екі жолдастық кездесу өткізеді

АСТАНА. KAZINFORM — Футзалдан Қазақстан құрамасы Тәжікстанмен 22 және 24 тамыз күндері екі жолдастық кездесу өткізеді.

Ұлттық құраманың оқу-жаттығу жиыны 5 тамыз күні Алматы қаласында басталды. Футболшыларды бабына келтіру процесін қамтитын бірінші кезең 18 тамызға дейін жалғасты.

Енді құрама 5 қыркүйекке дейін Астанада жаттығады. Екінші оқу-жаттығу жиыны барысында Қазақстан құрамасы Тәжікстанмен 22-24 тамыз күндері екі мәрте жолдастық кездесу өткізеді.

Одан кейін Қазақстан құрамасының Иранға қарсы екі жолдастық матчы жоспарланған. Ойындар 30 тамыз және 1 қыркүйекке белгіленген. 

Жиынның қорытынды кезеңі Алматыда 6-10 қыркүйек аралығында болады. 7 қыркүйек күні Қазақстан құрамасы Аргентинамен шеберлік байқасады. 

Оқу-жаттығу жиынына 21 футболшы шақырту алған. Нақты тізімге 14 ойыншы енеді.

Айта кетсек, биыл әлем чемпионаты 14 қыркүйек пен 6 қазан аралығында Өзбекстанда өтеді.

Қазақстан құрамасы Испания, Ливия және Жаңа Зеландия құрамаларымен кездеседі.